बन्दिपुर, साउन २७
हिजो आजका युवाहरुको साँझको समय कसरी बितेको हुन्छ ? इट्टा जत्रो मोबाइलमा घोप्टिएरै त होला नि हैन र ? तर बन्दिपुर गाउँपालिका–२ मुच्चुकका युवाहरु भने हरेक साँझ पन्चेबाजा बजाउन सिक्ने गरेका छन् ।
केही समय अघि प्राप्त भएको पन्चेबाजा सिक्न मुच्चुकका युवाहरु कस्सिएका छन् । रिस्ती विकास समाजको समन्वयमा मुच्चुकमा रहेको मुकेन्देश्वरी आमा समूहलाई नौमती बाजा हस्तान्तरण गरिएको थियो । स्थानीय समाजसेवी एवम् कांग्रेस नेता रेशम गुरुङको पहलमा मुकेन्देश्वरी आमा समूहलाई नौमती बाजा हस्तान्तरण गरिएको थियो ।
पन्चेबाजा सिकेर आफ्नो कला र संस्कृतिको संरक्षण र प्रबद्र्धन गर्ने भन्दै युवाहरुले हरेक रात एकै ठाउँमा जम्मा भएर पन्चेबाजा बजाउन सिक्दै आएका छन् । संयुक्त राज्य अमेरिकामा रहेका विनोद थापा, तपस भट्टराई, कुवेतमा रहेका राजेन्द्र बिराई, काठमाडौँमा रहेकी पूर्व शिक्षिका पूर्णिमा आले (कुलुङ) र तनहुँका कांग्रेसका नेता एबम् ब्यबसायी पुरुषोत्तम खनालले पन्चेबाजाको लागि आर्थिक सहयोग गरेका थिए ।
उक्त नौमती बाजा रिस्ती विकास समाज तनहुँका अध्यक्ष नवीनराज पौडेलले बन्दिपुर–२ का स्थानियलाई जिविकोपार्जन र स्वरोजगारमा टेवा पुग्ने उद्देश्यले हस्तान्तरण गरेका थिए ।
