काठमाडौं, भदौ २६
१६ दिनदेखि बेपत्ता रहेका नेपाली सेनाका सेनानी विमल पण्डितको मंगलबार भेरी नदीमा शव फेला परेको छ । उनी डोल्पाको दुनैस्थित नन्दबक्स ब्यारेकमा कार्यरत थिए।
त्रिपुरासुन्दरी नगरपालिका–५ अन्तर्गत पर्ने करबगाडको चिन्ढेबगर नजिक भेरीको किनारमा उनको शव फेला परेको घटनास्थलमा पुगेका डीएसपी शिब बुढाथोकीले वताए।
भेरीमा माछा मार्ने मछ्वाराले बिहान ६ बजेतिर त्रिपुरासुन्दरी–५ का परिमल भनिने सिबमल सार्कीले चिन्ढेबगर नदी किनारमा लास देखेका थिए। उनले पछि खदांगस्थित प्रहरी चौकीमा खबर गरेपछि प्रहरीले गएर शव बरामद गरेको थियो।
प्रहरी पुगेपछि रामबाण गुल्मका गुल्मपती ध्रुव कार्कीको टोलीसमेत शव भेटिएको ठाउँमा पुगेको थियो। भेरीको किनारमा ढुंगाको खोचमा रहेको शव बाहिर निकालेपछि मेजर पण्डितले लगाएका घडी, औंठीबाट शव पहिचान भएको प्रहरीले जनाएको छ।
डीएसपी बुढाथोकीका अनुसार शव पहिचानका लागि मेजर पण्डितका दाजु कुमार पण्डितसमेत घटनास्थलमा पुगेका थिए । काठमाडौंस्थित कागेश्वरी मनोहरा नगरपालिका डाँछी घरभई डोल्पामा कार्यरत ३८ वर्षीय मेजर पण्डित भदौ १० गते अपराह्न ४ बजेबाट बेपत्ता भएका थिए ।
