देवघाट, असोज ९
देवघाट मल्टिमिडिया प्रालिले माल्टानेपाल अनलाइन डटकम प्रकाशन सुरु गरेको छ । रोजगारीको लागि माल्टा पुगेका नेपाली पत्रकारहरु तथा युवाहरुको समुहले उक्त अनलाइन सन्चालनमा ल्याएको हो ।
उक्त अनलाइनको प्रकाशकमा देवघाट मल्टिमिडिया प्रा.लि देवघाट रहेको छ भने प्रधानसम्पादकमा प्रकाश बगाले रहेका छन् । बगाले देवघाट अनलाइन डटकमका पनि सम्पादक हुन् । उनी डेढ दशकदेखी पत्रकारितामा संलग्न छन् । बगाले देवघाट सन्देश साप्ताहिकका संस्थापक सम्पादक पनि हुन् । बगाले हाल माल्टामा कार्यरत छन् ।
त्यस्तै सम्पादकमा विप्लव काफ्ले, कार्यकारी सम्पादकमा छेसाङ लोप्चान तथा उप सम्पादकमा पासाङ रुम्बा र व्यवस्थपान प्रमुखमा दिनेश कार्की रहेका छन् । यस अनलाइनको प्रधान कार्यालय देवघाटमा र कर्पाेरेट कार्यालय माल्टामा रहेको छ ।
‘हामी परदेशको भूमिमा पसिना बगाएर भएपनि सच्चा पत्रकारिता गर्दै जनतालाई सहि खबर पस्किरहन्छौँ । विज्ञान, प्रविधिको विकासले विश्वका गतिविधि हातबाटै हेर्न, सुन्न, पढ्न मिल्ने बनिसकेको छ । एकछिन पनि सूचना पाउने माध्यमबाट टाडै बस्न सकिदैन । हामी परदेशदेखि घरदेशसम्म सत्य, तथ्य प्रस्तुत गर्छौँ ।’ प्रधान सम्पादक बगालेले भने ।
‘सुन्दर समुन्द्रले घेरिएको माल्टालाई हिमालको चुचुराहरुले सजिएको नेपाललाई जोड्छौँ । नेपाल र नेपालीको हितमा निरन्तर लाग्छौँ, हाम्रा पाठक, दर्शकप्रति बाहेक अरु कसैप्रति हामी उत्तरदायी छैनौँ । सही सूचनाका लागि हामीलाई गर्नुभएको विश्वासप्रति आभारी छौँ ।’ उनले भने । देवघाट अनलाइनलाई झैं माया र विश्वास दिनुहुनेछ भन्ने बगालले विश्वास लिएका छन् ।
