दमौली, असोज १६
भानु नपा–१ नयाँ बस्तीकी ७३ बर्षिया एकल महिला रुमाया गिरीको घर गत आईतबार अज्ञात समहुले भत्काईदिएको छ । घर भत्काईदिएपछि घरबार विहिन भएकी बृद्धालाई स्थानीय समाजसेवी तथा मानवअधिकार समुह भानुकी सदस्य तुलसी गैह्रेले आफ्नो घरमा आश्रय दिएर राखेकी छिन् ।
ऐलानी जग्गामा भाईले बनाईदिएको सानो टहरोमा बस्दै आएकी गिरीको घर अज्ञात समुहले भत्काएपछि आफुले घरमा ल्याएर राखेको मानवअधिकार समुह भानुकी सदस्य गैह्रेले बताइन् । बृद्धाको एक छोरा भएपनि उनी कहिलेकाँही आउने र आमालाई कुटपिट गर्ने, बृद्धभत्ताको पैसा खोसेर लैजाने गर्ने गैह्रेले बताइन् ।
घर भत्काईदिएपछि चिन्तित अवस्थामा बृद्धा
‘कहिलेकाँही आउने छोराले कुटपिट गर्ने र अलि अलि भएको पैसा पनि खोसेर लैजाने गर्छन्’ गैह्रेले भनिन् ‘छोरालाई कारवाही गर्न प्रहरीलाई अनुरोध गरेपनि प्रहरीले उजुरी बिना कारवाही गर्न नसकिने भन्दै आएको छ ।’
इलाका प्रहरी कार्यालय भानुका इन्चार्ज प्रहरी निरिक्षक शुशिल पोख्रेलले यसबारेमा प्रहरीमा हालसम्म कुनै उजुरी नआएको बताए । ‘अव मैले जानकारी पाएँ,’ पोख्रेलले भने ‘अव टोल विकास संस्थाका व्यक्ति तथा पीडित पक्षलाई बोलाएर के भएको हो बुझ्छु र पीडितलाई न्याय दिलाउँछु ।’
