देवघाट, असोज २०
अर्थमन्त्री डा.प्रकाशशरण महत शनिबार विहान तनहुँको पवित्र धार्मिक तिर्थस्थल देवघाट आएका छन् ।
भरतपुर विमानस्थलबाट दासढुङ्गा हुँदै देवघाट आएका अर्थमन्त्री महतलाई दासढुङ्गामा देवघाट गाउँपालिकाका अध्यक्ष तिलबहादुर थापा, गाउँपालिका उपाध्यक्ष भुवन सिं गुरुङ, प्रमुख प्रशासकीय अधिकृत गौरी प्रसाद आचार्य गाउँपालिकाका प्रवक्ता एवं वडा नम्बर ५ का अध्यक्ष पूर्ण बहादुर कुँवर, तथा देवघाट गाउँपालिकाका जनप्रतिनिधि, कर्मचारी र विभिन्न टोल विकास संस्थाका पदाधिकारीहरुले स्वागत गरेका थिए ।
देवघाटमा अर्थमन्त्री महतले गलेश्वर आश्रमको निरिक्षण गरेका थिए । गलेश्वर आश्रममा अर्थमन्त्री महतलाई आश्रमका व्यवस्थापक विष्णुदेवानन्द गिरी, उपाध्यक्ष अद्वैतानन्द गिरी, आश्रमका कार्यालय सचिव महेन्द्र प्याकरेल लगायतले स्वागत गर्दै आश्रमको बारेमा जानकारी गराएका थिए ।
सो अवसरमा अर्थमन्त्री महतले गलेश्वर आश्रम अगाडीको पहिरो निरिक्षण गरेका थिए । पहिरोले आश्रमकै अस्तित्वमा संकट परेको हुँदा पहिरो नियन्त्रणको लागि बजेट विनियोजन गर्न आश्रमका पदाधिकारी तथा गाउँपालिकाका अध्यक्ष थापाले अर्थमन्त्री महतलाई अनुरोध गरेका थिए ।
निरिक्षण पछि अर्थमन्त्री महतले पहिरो नियन्त्रणकोलागि बजेट उपलब्ध गराउने आश्वासन दिएका थिए ।
गलेश्वर आश्रममा आयोजित कार्यक्रममा अर्थमन्त्री महतले देवघाट प्रमुख धार्मिक गन्तव्य भएको हुँदा धार्मिक पर्यटनको माध्यमलाई देवघाटको विकास गर्न सकिने बताए । देवघाटको धार्मिक सम्पदाहरुको संरक्षण र प्रबद्र्धनकोलागि संघीय सरकारबाट आवश्यक बजेटको व्यवस्था गर्ने पनि अर्थमन्त्री महतले बताए ।
