दमौली, असोज २१
नेकपा एमालेको गन्डकी प्रदेश कमिटिको सदस्य बन्न खोज्दा एमाले तनहुँ जिल्ला कमिटिका सदस्यहरु रनबहादुर राना, रणबहादुर गुरुङ र फुलमाया वाग्लेले जिल्ला कमिटिको सदस्य पद पनि गुमाएका छन् ।
तिनै जना प्रदेश कमिटिको सदस्यमा चुनाव लडेर पराजित भएका थिए । एउटा कमिटिको सदस्य बहाल रहिरहँदा अर्काे कमिटिमा चुनाव लडेपछि त्यो पद गुम्ने एमालेको निर्णय अनुसार जिल्ला कमिटि सदस्य रहेका राना, गुरुङ र वाग्लेले जिल्ला सदस्य गुमाएका हुन् ।
जिल्ला कमिटि सदस्य रहेका भिमादका मेखबहादुर थापा, बाबुराम सुनार र म्याग्देकी रत्ना घिमिरे भने प्रदेश कमिटि सदस्यमा निर्वाचित भएका छन् । माथिल्लो कमिटिमा निर्वाचित भएपछि थापा, सुनार र घिमिरेको जिल्ला कमिटि सदस्य पनि रिक्त भएको छ । त्यस्तै भानु नगर कमिटिका अध्यक्ष रहेका प्रेम राना पनि प्रदेश कमिटि सदस्यमा निर्वाचित भएका कारण उनको पद पनि रिक्त भएको छ ।
त्यसबाहेक अन्य प्रदेश कमिटिमा निर्वाचित भएका र पराजित भएकाहरु सबै यस अघि पनि प्रदेश कमिटिकै सदस्य रहेका थिए ।
