देवघाट, मंसिर १५
देवघाट गाउँपालिकाका–५ स्थित देवघाट सामुदायिक सिकाई केन्द्रको १० औं तथा देवघाट सार्वजनिक पुस्तकालयको १९ औँ बार्षिक साधारण सभा शुक्रबार नेपाल रेडक्रस सोसाईटी देवघाटको कार्यालयमा सम्पन्न भएको छ ।
सो कार्यक्रममा प्रमुख अतिथि देवघाट गाउँपालिकाका उपाध्यक्ष भुवन सिंह गुरुङले देवघाट सार्वजनिक पुस्तकालयलाई अघि बढाउन गाउँपालिकाले सक्दो सहयोग गर्ने बताए । पुस्तकालय भवन निर्माणको लागि देवघाट गाउँपालिकाले अघिल्लो आर्थिक वर्षमा १० लाख रुपैया बजेट बिनियोजन गरिएको र चालु आर्थिक वर्षमा पनि सहयोग गर्ने प्रतिबद्धता जनाए ।
सो अवसरमा उपाध्यक्ष गुरुङले पुस्तकालयको भवन निर्माणकोलागि आफ्नो ब्यक्तिगत तर्फबाट १५ हजार १ सय १५ रुपैयाँ सहयोग गरेका थिए । साथै उनले अन्य व्यक्ति तथा संघ संस्थालाई पनि पुस्तकालय भवन निर्माणमा सहयोग गर्न अनुरोध गरे ।
सो कार्यक्रमका देवघाट गाउँपालिका वडा नम्बर ५ का अध्यक्ष पूर्ण वहादुर कुँवरले पुस्तकालयको भवन निर्माणकोलागि वडाको तर्फबाट २ लाख रुपैया बजेट बिनियोजन गरिएको जानकारी दिए । वडा अध्यक्ष कुँवरले पुस्तकालयलाई आवश्यक परेको अन्य सहयोग गर्ने प्रतिबद्धता पनि जनाए ।
देवघाट सामुदायिक सिकाई केन्द्रका अध्यक्ष जयकृष्ण सुवेदीको अध्यक्षतामा सम्पन्न सो कार्यक्रममा वडा नम्बर ५ का कमला गुरुङ, देवघाट गाउँपालिका शिक्षा शाखा प्रमुख होमनाथ लामिछाने, कालिका सामुदायिक वनका अध्यक्ष कृष्णराज न्यौपाने लगायतले शुभकामना मन्तव्य राखेका थिए ।
कार्यक्रममा देवघाट सार्वजनिक पुस्तकालयका अध्यक्ष शिवराज पैडेलले स्वागत मन्तव्य राखेका थिए भने कार्यक्रमको सन्चालन पुस्तकालयका सचिव फणिन्द्र प्रसाद पौडेलले गरेका थिए । साथै सिकाई केन्द्रको आर्थिक आय व्यय देवघाट सार्वजनिक पुस्तकालयका सदस्य अर्जुन अधिकारीले प्रस्तुत गरेका थिए भने पुस्तकालयको बार्षिक कार्यक्रम तथा आर्थिक प्रतिवेदन संस्थाका कोषाध्यक्ष महेन्द्र प्याकुरेलले प्रस्तुत गरेका थिए ।
