देवघाट, पुस २६ गते
भरतपुर महानगरपालिका–१ चितवन देवघाटधाममा रहेको सीताराम संस्कृत माविको आयोजनामा शुक्रबारदेखी हुने मकरस्नान महोत्सव–२०८० को प्रचार प्रसारकोलागि विहिबार मोटरसाईकल र्याली निकालिएको छ । सीताराम संस्कृत माविको सर्वाङ्गिण विकासकोलागि पुस २७ गते शुक्रबारदेखी माघ २ गतेसम्म त्रिशुली कालिगन्डकी वेणीसंगम देवघाटधाममा श्रीभद्भागवत अखण्डपाठारायण, कथावाचन एवं पितृउद्धारात्मक महायज्ञ तथा मकरस्नान महोत्सव हुने भएको छ ।
सो महायज्ञ एवं मकर स्नान महोत्सवको प्रचार प्रसारकोलागि विद्यालयका पुर्व विद्यार्थीहरुको संयोजनमा मोटरसाईकल र्याली निकालिएको हो । मोटरसाइकल र्याली महायज्ञ स्थलदेखि ठिमुरा–रामनगर–आपटारी–केन्द्रीय बसपार्क–पुल्चोक–पोखरा बसपार्क–आँपटारी हुँदै पुनः महायज्ञस्थलमा आएर समापन भएको थियो । सो र्यालीमा सयभन्दा बढि मोटरसाईकल चालकको सहभागिता रहेको थियो ।
महोत्सवको अन्तर्गत पुस २७ गते विहान ११ बजे कार्यक्रमको उद्घाटन हुनेछ । त्यसअघि विहान ८ बजे तनहुँ तर्फको बेणीसंगमबाट कलशयात्रा निकालिने कार्यक्रम रहेको छ । आवासीय छात्रावास समेत सञ्चालन गर्दै आएको उक्त विद्यालयकोे संस्कृत शिक्षा तथा समग्र पक्षको स्तरोन्नति गर्नका लागि अक्षयकोष स्थापना गर्ने उद्देश्यले महायज्ञ आयोजना गरिएको विद्यालयका प्रअ पोदराज पौडेल बताए ।
२०३५ सालमा ब्रह्मलिन बाबा डिल्लीराम ब्रह्माचारीद्वारा स्थापना गरिएको उक्त संस्कृत मावि चितवन जिल्लाको एक मात्र संस्कृत विषयमा पठनपाठन हुने सामुदायिक विद्यालय हो । उक्त विद्यालयमा हाल कक्षा ६ देखि १२ कक्षासम्म संस्कृत विषयमा पढाइ हुने गर्दछ । उक्त विद्यालयमा आवासीय छात्रावास पनि सन्चालन भईरहेको छ ।
हरिहर सन्यास आश्रमका पीठाधीश, नेपाल सन्त समाजका अध्यक्ष स्वामी ज्ञानानन्द सरस्वती, गलेश्वर आश्रमका पीठाधीश महामन्डलेश्वर स्वामी आत्मनन्द गिरि एवं महेश सन्यास आश्रमका पीठाधीश स्वामी रमणानन्द गिरिको प्रमुख संरक्षकत्वक र विश्वविख्यात कथावाचक श्री इश्वरकृष्ण माहाराजको प्रमुख बाचकत्वमा श्रीभद्भागवत अखण्डपाठारायण, कथावाचन एवं पितृ उद्धारात्मक महायज्ञ तथा मकरस्नान महोत्सव हुने विद्यालयका सहायक प्रअ एवं सचिवालय संयोजक अर्जुन पाण्डेयले बताए ।
