देवघाट, पुस २७
देवघाटमा सन्चालित रेडियो देवघाट १०२.६ मेघाहर्जले आफ्नो १३ औं बार्षिकोत्सवको अवसरमा शुक्रबार देवघाटका विभिन्न आश्रममा फलफूल वितरण गरेको छ ।
‘शान्ति र सदभाव हाम्रो अभियान’ भन्ने मूलनाराका साथ सगरमाथा सन्चार सेवाद्वारा सन्चालित उक्त रेडियोले बार्षिकोत्सव तथा रेडियोका संस्थापक अध्यक्ष भक्तिप्रसाद तिमिल्सिनाको तेस्रो स्मृति दिवसमा विभिन्न आश्रममा फलफुल वितरण गरिएको हो ।
सो कार्यक्रममा देवघाट गाउँपालिकाका अध्यक्ष तिलबहादुर थापाले देवघाटका सन्चार माध्यमले यस क्षेत्रको विकासको लागि ठुलो योगदान दिएको बताए ।
सन्चार माध्यमले बिकृती र बिसंगती अन्त्यको लागि काम गर्नुपर्ने भन्दै अध्यक्ष थापाले देवघाटलाई धार्मिक पर्यटनको केन्द्र बनाउन सन्चार माध्यमले प्रचार प्रसारमा जोड दिनुपर्ने बताए । सो कार्यक्रमको सन्चालन रेडियोका महासचिव निरन्जन हाडाले गरेका थिए ।
बार्षिकोत्सवको अवसरमा रेडियोले यसअघि गत बुधबार दौड प्रतियोगिता आयोजना गरेको थियो । रेडियोले माघ १ गते माघे संक्रान्तिको मेलाको वेणी संगमबाट प्रत्यक्ष प्रसारण गर्ने छ । त्यस्तै माघ ५ गते वक्तृत्वकला प्रतियोगिता एवं बुधबार आयोजित दौड प्रतियोगिताका विजेता खेलाडीहरुलाई पुरस्कार वितरण गरिने रेडियोका बजार प्रमुख गोपालचन्द्र न्यौपानेले जानकारी दिए ।
