आबुँखैरेनी, माघ १० गते
आबुँखैरेनी गाउँपालिकाका भुमिहिन सुकुम्बासीलाई जग्गाधनी प्रमाणपुर्जा वितरण गरिने भएको छ । आगामी माघ १५ गते गाउँपालिकाको प्राङ्गणमा कार्यक्रमको आयोजना गरि उनीहरुलाई जग्गाधनी प्रमाणपुर्जा वितरण गरिने गाउँपालिकाका अध्यक्ष शुक्र चुमानले बताए ।
राष्ट्रिय भूमि आयोग तनहुँले गत पुस २३ गते भूमिहीन सुकुम्बासीलाई जग्गाधनी प्रमाण पुर्जा उपलब्ध गराउने निर्णय गरेको थियो । सोही अनुसार पहिलो चरणमा आबुँखैरेनी गाउँपालिका–२ का १३ जनालाई जग्गाधनी प्रमाणपुर्जा वितरण गर्न लागिएको आयोगले जनाएको छ ।
२०७८ फागुन १६ गते गठन भएको आयोगले पहिलो पटक भूमिहीन सुकुम्बासीलाई जग्गा उपलब्ध गराउने निर्णय गरेको हो । आयोगको गत पुस २३ गतेको निर्णयअनुसार भूमिहीन दलित र भूमिहीन सुकुम्बासीलाई जग्गा उपलब्ध गराउने निर्णय भएको आयोगका अध्यक्ष रामचन्द्र अधिकारीले जानकारी दिए । उनका अनुसार यही माघ १५ गते आँबुखैरेनी गाउँपालिका–२ का १३ जनालाई जग्गाधनी प्रमाणपुर्जा वितरण गर्न लागिएको हो । उनले भने, ‘निजहरुलाई माघ २ गतेदेखि १५ दिनभित्र जग्गा दर्ताका लागि आयोगको कार्यालयमा परिवारमूली र निजको पति वा पत्नी उपस्थित हुन सूचना जारी गरिएको छ ।’
यसअगाडि गाउँपालिकाले निस्सा वितरण गरेका उक्त वडाका व्यक्तिहरुको जग्गा नापजाँच पश्चात् दाबी पुगेका १३ जनालाई जग्गा वितरण गर्न लागिएको अधिकारीले बताए । गाउँपालिकाबाट १६ जनाको नाम आए पनि तीनजनाको जग्गा देखिएकाले १३ लाई जग्गा वितरण गरिने अध्यक्ष अधिकारीले बताए ।
आवुँखैरेनी गाउँपालिकाका अध्यक्ष शुक्र चुमानले माघ १५ गते भव्य समारोहको विच १३ जना भुमिहिन सुकुम्बासीलाई जग्गाधनी प्रमाणपुर्जा उपलब्ध गराइने बताए । उनले क्रमश सम्पुर्ण भुमिहिन सुकुम्बासी, दलित भुमिहिन र अव्यवस्थित बसोबासी हरुलाई भुमी ऐनको दायरामा रहि जगगधनी प्रमाणपुर्जा बितरण अभियान जारी रहने बताए ।
