दमौली, माघ १३
आगामी माघ १९ र २० गते काठमाडौंमा हुने कृष्णप्रसाद भट्टराई स्मृति राष्ट्रिय कराँते प्रतियोगताको लागि गन्डकी प्रदेशबाट खेलाडी छनौट गरिएको छ । शनिबार दमौलीमा आयोजित छनौट प्रतिश्पर्धा मार्फत विभिन्न स्पर्धाकोलागि खेलाडीहरु छनौट गरिएको हो ।
गन्डकी प्रदेशका मनाङ र मुस्ताङ बाहेक ९ जिल्लाका खेलाडीहरु सहभागि भएको उक्त प्रतियोगिताबाट ११ महिला र ९ पुरुष गरि २० जना खेलाडी छनौट गरिएको नेपाल कराँते महासंघ गन्डकी प्रदेशका अध्यक्ष मनिराज थापाले बताए ।
खेलाडी छनौटकोलागि शनिबार दमौलीमा नेपाल कराँते महासंघ गन्डकी प्रदेशको आयोजना तथा नेपाल कराँते महासंघ तनहुँको व्यवस्थापनमा आयोजित कार्यक्रमको प्रतिनिधि सभाका सदस्य डा. स्वर्णिम वाग्लेले उद्घाटन गरे ।
सो अवसरमा बोल्दै सांसद वाग्लेले राज्यको नेतृत्व तहमा खेल क्षेत्र बुझेकाहरु नहुँदा खेलकुँद क्षेत्र सँधै ओझेलमा परेको बताए । उनले तनहुँ जिल्लामा खेल मैदानको निर्माण तथा खेलाडीहरु उत्पादनको लागि पहल गर्ने बताए ।
नेपाल कराँते महासंघ गन्डकी प्रदेशका अध्यक्ष मनिराज थापाको अध्यक्षतामा सम्पन्न सो कार्यक्रममा जिल्ला खेलकुद विकास समिति तनहुँका अध्यक्ष अनिल पाण्डे, गन्डकी प्रदेशका रेफ्री संयोजक सुरेन्द्र गुरुङ, नेपाल सितेरियो महासंघ तनहुँका अध्यक्ष किशोरराज खनाल लगायतले शुभकामना मन्तव्य राखेका थिए ।
