दमौली, माघ २१
व्यास नपा–३ देउराली नगरको सेतीमादी घाटको उत्तरतर्फ संरक्षण विहिन अवस्थामा रहेको जिर्ण पाटी व्यास नपा–४ का आइतबहादुर घलेले व्यक्तिगत खर्चमा पुननिर्माण र जिर्णाेद्वार गरेका छन् । स्थानीय तहको आँखामा पर्न नसकेको कलात्मक पाटी घलेले व्यक्तिगत खर्चमा जिर्णाेद्वार गरेका हुन् ।
दमौलीघाट जाने बाटोको छेउमा कलात्मक बुटाले कुदिएको जीर्ण अवस्थामा रहेको उक्त पाटी आफुले व्यक्तिगत खर्चमा संरक्षण र जिर्णाेद्वार गरेको घलेले बताए । उक्त पार्टी जिर्णाेद्वारमा ८१ हजार ६ सय रुपैयाँ खर्च भएको घलेले जानकारी दिए ।
उक्त पाटी वि.सं २००७ मा निर्माण भएको बताईएको छ । संरक्षणको अभावमा जिर्ण हुँदै गएको उक्त पाटीको मर्मत सम्भार गरि हेर्न र बस्न लायक बनाएको घलेले बताए । सम्पदाका रूपमा रहेका पाटीपौवा र ठाँटी उचित संरक्षण अभावमा लोप हुँदै गएका छन् ।
इतिहास मेटिनु हुँदैन, संरक्षण गरेर राख्नुपर्छ भन्ने सोचका साथ आफू यसको संरक्षणमा जुटेको घलेले बताए । सम्बन्धित वडा कार्यालय र नगरपालिकालाई पाटीको संरक्षण गर्न आग्रह गरे पनि बेवास्ता गरेपछि आफ्नो व्यक्तिगत खर्चमा मर्मत सम्भार गरेको उनले बताए ।
स्थानीय तह र स्थानीय टोल विकास संस्थाबाट स्वीकृति लिएर मर्मत सम्भार गरेको उनले बताए । करिब एक साताको अवधिमा उक्त जीर्ण बनेको पाटीलाई हेर्न लायकको बनाएको घलेले बताए । पाटीमा रहेका पुराना संरचना र कलालाई नबिगारीकन मर्मत सम्भार गरिएको उनले बताए । घले राष्ट्रिय प्रजातन्त्र पार्टीको व्यास नगर समितिका सभापती हुन् ।
