भरतपुर, जेठ २४
नेकपा (एमाले) का अध्यक्ष केपी शर्मा ओली भोलि (शुक्रबार) चितवन आउने भएका छन् । एमाले चितवनको ११ औं जिल्ला अधिवेशनबाट निर्वाचित अध्यक्ष, पदाधिकारी तथा सदस्यहरुको सपथग्रहण समारोहलाई सम्बोधन गर्न ओली चितवन आउन लागेका हुन् ।
नवनिर्वाचित सचिव प्रकाश ढुंगानाका अनुसार भोलि होटल ग्यालेक्सीमा बिहान ११ बजेबाट कार्यक्रम प्रारम्भ हुनेछ । कार्यक्रमको सम्पूर्ण तयारी पूरा भएको ढुंगानाले जानकारी दिए । कार्यक्रम अनुसार प्रमुख निर्वाचत अधिकृत जगन्नाथ भण्डारीले नवनिर्वाचित अध्यक्ष पाठकलाई सपथग्रहण गराउनेछन् । भने अध्यक्ष पाठकले पदाधिकारी तथा सदस्यहरुलाई सपथग्रहण गराउनेछन् ।
सो कार्यक्रममा पार्टी अध्यक्ष केपी शर्मा ओली सहित केन्द्रीय नेताहरुले सम्बोधन गर्ने कार्यक्रम रहेको ढुंगानाले बताए । उनले पार्टीका नेता, कार्यकर्ता तथा शुभेच्छुकहरुलाई कार्यक्रममा उपस्थितिका लागि आव्हान समेत गरे ।
एमाले चितवनको ११ औं अधिवेशन गत १६ गते सम्पन्न भएको थियो । सपथग्रहणसँगै नवनिर्वाचित कार्यसमितिले आफ्नो जिम्मेवारी सम्हाल्ने छ ।
