दमौली, साउन २
म्याग्दे गाउँपालिकाले आर्थिक वर्ष २०८०÷०८१ मा हल गोरु पाल्ने कृषकलाई १३ लाख ८० हजार रुपैयाँ अनुदान उपलब्ध गराएको छ । गाउँपालिकाको पशु सेवा उपशाखाको वार्षिक स्वीकृत कार्यक्रम अन्तर्गत हल गोरु पाल्ने कृषकलाई प्रोत्साहन स्वरुप उक्त रकम उपलब्ध गराईएको गाउँपालिकाले जनाएको छ ।
उक्त कार्यक्रमबाट ३५४ हल गोरु पाल्ने कृषक लाभान्वित भएको गाउँपालिकाका पशु सेवा उपशाखाका प्रमुख डा. विनयकुमार शाहले बताए । प्रति हलगोरु ४ हजार रुपैयाँ अनुदान दिने गाउँपालिकाको नीनि अनुसार ३५४ हल गोरु पाल्ने कृषकलाई कुल १३ लाख ८० हजार रुपैयाँ अनुदान दिईएको शाहले बताए । उक्त कार्यक्रमको लागि गाउँपालिकाले सुरुमा १० लाख बिनियोजन गरेकोमा उक्त रकमले नपुगेपछि बाँकी रकम पछि रकमान्तर गरिएको थियो ।
हलगोरु पाल्ने कृषकलाई अनुदान दिने म्याग्दे गाउँपालिका देशभरका ७५३ स्थानीय तह मध्ये पहिलो भएको गाउँपालिकाका अध्यक्ष श्रीप्रसाद श्रेष्ठले दाबी गरे । गोरु पाल्ने क्रम घट्दा जग्गा बाँझो हुने क्रम बढेपछि कृषकलाई प्रोत्साहनका लागि रकम उपलब्ध गरिएको गाउँपालिकाका अध्यक्ष श्रेष्ठले बताए ।
गाउँपालिकाका अध्यक्ष श्रेष्ठले गोरु पाल्ने प्रचलन घट्दै जाँदा खेतबारी बाँझो हुन थालेपछि जग्गा बाँझो हुन नदिनका लागि पनि यो कार्यक्रम ल्याइएको बताए । उनले भने, ‘प्रोत्साहन रकमले हलगोरु पाल्ने कृषक अझै बढ्ने विश्वास लिएका छौँ । गोरु पाल्ने क्रम बढ्दा खेतबारी बाँझो रहँदैन ।’
गाउँपालिकाका उपाध्यक्ष बालकृष्ण घिमिरेले गोरु पाल्ने प्रोत्साहनका लागि उपलब्ध गराइएको रकम गोरुको पोषणका लागि खर्च गर्न कृषकलाई सुझाव दिए । गाउँपालिकाले हल गोरु पोषण अनुदानवापत सबै वडाका ३५४ हल गोरु पाल्ने कृषकलाई जनही ४ हजारको दरले प्रोत्साहन रकम उपलब्ध गराईएको उपाध्यक्ष घिमिरेले बताए । यो संख्या आर्थिक वर्ष ०७९÷८० मा दुई सय ५० रहेको थियो । प्रोत्साहन रकम पाएपछि हल गोरु संरक्षणमा सहयोग पुग्ने भन्दै कृषक खुसी भएका छन् । लोकवाणी दैनिकबाट
