दमौली, साउन ९
नेकपा एमाले तनहुँको टोलीले तनहुँको देवघाट गाउँपालिका–४ र चितवनको भरतपुर महानगरपालिकाको गाईघाट जोड्ने त्रिशुली नदीमा पक्की पुल निर्माणको लागि आवश्यक बजेट विनियोजन गर्न माग गरेको छ ।
बुधबार उपप्रधान तथा अर्थमन्त्री विष्णु पौडेललाई भेट गरि एमाले तनहुँको टोलीले गाईघाटमा पक्की पुल तथा गाईघाट–गल्याङ सडकको लागि आवश्यक बजेट उपलब्ध गराउन माग गरेका थिए ।
त्यसैगरि दासढुङ्गा र देवघाटमा रहेको मदन–आश्रीत स्मृति पार्क बजेटको अभावमा त्यसै अपलपत्र परेको हुँदा उक्त पार्कको लागि पनि आवश्यक बजेट विनियोजन गर्न एमाले तनहुँको टोलीले अर्थमन्त्री पौडेल समक्ष माग गरेको छ ।
सो अवसरमा अर्थमन्त्री पौडेलले गाईघाटको पक्की पुल र गाईघाट गल्याङ सडक आफु यस अघि अर्थमन्त्री हुँदा नै प्राथमिकतामा राखेको हुँदा पुनः उक्त योजना अगाडी बढाउन आवश्यक बजेट विनियोजन गर्ने आश्वासन दिए । साथै देवघाटको मदन–आश्रीत पार्कको लागि पनि आवश्यक बजेट उपलब्ध गराउने मन्त्री पौडेलले प्रतिबद्धता जनाएको नेकपा एमाले तनहुँका उपाध्यक्ष राजेश्वर ढकालले बताए ।
यसैगरि मन्त्री पौडेलले मुग्लिन–नारयणगढ सडकको विकल्पमा तनहुँ तर्फ निर्माण हुने बैकल्पिक सडकको लागि पनि बजेट बिनियोजन गर्ने बताएको एमाले तनहुँका उपाध्यक्ष ढकालले जानकारी दिए ।
सो भेटमा एमाले केन्द्रीय सदस्य तथा राष्ट्रिय सभामा सत्तापक्षका मुख्य सचेतक भगवती न्यौपाने, एमाले तनहुँका निवर्तमान अध्यक्ष श्रीप्रसाद श्रेष्ठ तथा जिल्ला कमिटिका अध्यक्ष हरिराज कडेंल, उपाध्यक्ष राजेश्वर ढकाल, सचिव प्रदिपराज अधिकारी र उपसचिवद्वय खिम कुमाल र सुनिता नेपाली थिए ।
