दमौली, साउन २३
आँबुखैरेनी गाउँपालिका वडा नम्बर ३ मा रहेको मर्स्याङदी बाल ज्योति इङलिस बोर्डिङ स्कुल र बाल शिक्षा सदन इङलिस बोर्डिङ स्कुलमा अध्ययनरत विद्यार्थीहरुमा डेंगुको संक्रमण भएपछि उक्त दुई विद्यालय बन्द गरिएको छ ।
डेंगु संक्रमणका कारण बिरामी हुने विद्यार्थीको संख्या बढ्दै गइरहेकोले यी दुईवटा विद्यालय बन्द गर्न निर्देशन दिईएको आबुँखैरेनी गाउँपालिकाका शिक्षा अधिकारी निर्मला कुवँरले बताइन् । पालिकाका अन्य विद्यालयहरुले समेत विद्यार्थीहरुको बिरामीको अवस्था अनुसार बिरामी संख्या वृद्धि भएको खण्डमा विद्यालय बन्द गर्नुहुन र डेंगु रोगको रोकथाम तथा नियन्त्रणमा लाग्न सबैमा अनुरोध गरिएको कुँवरले बताइन् ।
आबुँखैरेनी गाउँपालिकाका अध्यक्ष शुक्र चुमानले डेंगु नियन्त्रणका सम्बन्धमा पूर्व तयारी तथा विशेष सतर्कता अपनाउनु हुन साथै उपचारमा समस्या भएका तथा बीमा नभएको विद्यार्थीहरुलाई आँबुखैरेनी अस्पतालमा निःशुल्क उपचारको व्यवस्था गरिएको बताए ।
स्वास्थ्य कार्यालय तनहुँका अनुसार तनहुँका १० पालिका मध्ये सबैभन्दा धेरै आबुँखैरेनीमा डेंगु संक्रमणको पुष्टि भएको छ । स्वास्थ्य कार्यालय तनहुँका प्रमुख शंकरबाबु अधिकारीका अनुसार आबुँखैरेनीमा मंगलबारसम्म ४२७ जनामा डेंगु संक्रमण पुष्टि भएको छ ।
