दमौली, साउन २४
प्रतिनिधि सभाका सांसद कृष्णकुमार श्रेष्ठ किसानले पहाडमा भन्दा मधेसमा सामुदायिक विद्यालयको अवस्था बिजोग रहेको बताएका छन् । प्रतिनिधि सभाको शिक्षा सम्बन्धि समितिको बैठकमा बोल्दै सांसद श्रेष्ठले मधेसमा विद्यालयहरुको अवस्था बिजोग भएको हुँदा पुर्वाधार निर्माणको बारेमा सोच्नु पर्ने बताए ।
आफु यस अघि ५ बर्ष पहाडी जिल्ला तनहुँको सांसद भईसकेको र हाल मधेस प्रदेशको बारा जिल्लाको सांसदको रुपमा रहँदा उक्त दुई भुगोलको विद्यालयहरुको तुलना गर्दा मधेसमा धेरै नै बिजोग पाएको बताए । मधेसमा विद्यालय भवन नहुँदा विद्यार्थीहरु आँपको बगैंचामा त कतै फुसको छानामुनी बसेर पनि पढ्नु परेको सांसद श्रेष्ठले बताए ।
नयाँ सरकारसँग विद्यालयको पुर्वाधार निर्माणको लागि बजेट विनियोजन गर्न माग गर्नुपर्ने सांसद श्रेष्ठले बताए । पाहाडी क्षेत्रका गाउँका विद्यालयमा विद्यार्थी नहुँदा भवन रित्तै भएको तर मधेसमा विद्यार्थीहरुले पढ्न भवन समेत नपाएको श्रेष्ठले बताए । शैक्षिकक्षेत्र सुधार्नकोलागि प्रत्येक जिल्लामा एक एक वटा बुढानिलकण्ठ जस्तै विद्यालय खोल्नुपर्ने उनले सुझाव दिए ।
अंग्रेजी बोल्न जान्दैमा विद्वान भइने भ्रम रहेको भन्दै श्रेष्ठले संसदमा पनि अंग्रेजी बोलेर आफुलाई ठुलो ठान्ने प्रबृत्ति रहेको बताए । शिक्षकलाई राजनीति गर्न नदिने यस अघिको शिक्षामन्त्रीको निर्णय प्रति सांसद श्रेष्ठले आपत्ती जनाए । शिक्षकहरुले आफ्नो पेशा बाहेकको समयमा राजनीतिक गतिविधिमा सरिक हुन रोक लगाउन नहुने उनले बताए । शिक्षकहरुलाई मर्यादित र पेशागत रुपमा सम्मानित बनाउनु पर्ने उनको भनाई थियो ।
