दमौली, साउन २६

तनहुँमा नागरिकताको प्रमाणपत्र भन्दा राहदानी लिनेको संख्या बढि रहेको पाईएको छ । जिल्ला प्रशासन कार्यालय तनहुँका अनुसार आर्थिक वर्ष २०८०÷०८१ मा नागरिकता भन्दा राहदानी लिनेको संख्या बढि रहेको हो ।

जिल्ला प्रशासन कार्यालय तनहुँले गत आर्थिक वर्षमा १५ हजार सात सय ७७ राहदानी वितरण गरेको छ । राहदानी लिनेमध्ये छ हजार सात सय ३४ महिला र नौ हजार ५३ पुरुष रहेको प्रशासन कार्यालयका प्रशासकीय अधिकृत विकास श्रेष्ठले जानकारी दिए । उनका अनुसार सोही अवधिमा १६ हजार सात सय ४३ राहदानी सिफारिस गरिएको छ ।

कार्यालयले एक वर्षको अवधिमा आठ हजार नौ सय ५५ नागरिकता वितरण गरेको छ । त्यसमध्ये वंशजको आधारमा आठ हजार नौ सय ४६ र वैवाहिक अङ्गिकृतको आधारमा नौ जनालाई नागरिकता वितरण गरिएको छ । नागरिकता प्राप्त गर्नेमध्ये चार हजार सात सय २८ महिला र चार हजार दुई सय २६ पुरुष छन् । यसैगरी सात हजार छ सय ६१ जनालाई नागरिकताको प्रतिलिपि र ४३ जनालाई गैर आवासीय नागरिकता वितरण गरिएको कार्यालयले जनाएको छ ।

साथै सोही अवधिमा नौ महिला र १९ पुरुष गरी २८ जनाको नागरिकता रद्ध गरिएको छ । वैदेशिक रोजगारीमा जाने जिल्लामध्ये गण्डकी प्रदेशमा तनहुँ उच्च जिल्ला भएकाले पनि नागरिकता भन्दा बढी राहदानी वितरण भएको हुन सक्ने बताइएको छ ।

कार्यालयबाट पाँच सय १५ जनालाई नाबालक परिचयपत्र, १४ जनालाई प्रतिलिपि वितरण गरिएको छ । २५ हजार दुई सय २७ जनाको राष्ट्रिय परिचयपत्र नयाँ दर्ता गरिएको छ भने एक हजार १४ परिचयपत्र वितरण गरिएको कार्यालयले जनाएको छ । आठ सय ४५ जनालाई जनजाति प्रमाणित, चार सय १८ जनालाई दलित प्रमाणित, एक सय जनालाई विपन्न खस आर्य प्रमाणित, ३८ जनालाई मुस्लिम प्रमाणित गरिएको कार्यालयले जानकारी दिएको छ ।

त्यस्तै एक सय ५८ जनाको तिब्बतीयन शरणार्थी परिचयपत्र नवीकरण गरिएको छ भने १२ जनालाई यात्रा अनुमति पत्र सिफारिस गरिएको छ । त्यसअवधिमा कार्यालयमा एक सय ४५ मुद्धा दर्ता भएकामा ७९ फछ्र्यौट भएका छन् ।

संस्था दर्तातर्फ २५ नयाँ दर्ता, छ सय ८७ नवीकरण, हातहतियारतर्फ तीन नवीकरण र एक नामसारी भएका छन् । कार्यालयले संस्था दर्ताबाट रु १० लाख ३० हजार छ सय दश, हातहतियारबाट रु छ लाख १ हजार एक सय २५, राहदानी दस्तुरबाट रु आठ करोड ४६ लाख ५३ हजार पाँच सय, न्यायिक दण्ड जरिवानाबाट रु ११ लाख ५० हजार छ सय ३८, प्रशासनिक दण्ड, जरिवाना र जफतबाट रु दुई लाख २३ हजार राजश्व सङ्कलन गरेको छ ।