दमौली, साउन २८

४० बर्ष मुनीका ४० प्रभावशाली युवामध्येमा आबुाखैरेनी गाउँपालिकाका अध्यक्ष शुक्र चुमान छनौट भएका छन् । अनलाइनखबर डटकमले १२ अगष्ट अर्थात् अन्तर्राष्ट्रिय युवा दिवसको सन्दर्भमा सार्वजानिक गरेको नेपालका ‘४० वर्ष मुनिका ४० प्रभावशाली युवा’ को सूचीमा आबुँखैरेनी गाउँपालिकाका अध्यक्ष चुमान पनि छनौट भएका छन् ।

उक्त सुचीमा राजनीति, समाज, कला÷साहित्य, संस्कृति, युवा तथा खेलकुद, ज्ञान विज्ञान, उद्यम व्यवस्था र डायस्पोरा क्षेत्रका प्रतिनिधिमूलक ४० युवाहरु छन् । अन्तिम सूची तयार हुनुअघि अनलाइनखबरले काठमाडौंमा रहेको आफ्नो केन्द्रीय समाचार कक्ष र सातै प्रदेशका ब्युरोहरूबाट सम्भावित व्यक्तिहरूको नामावली सहितको प्रारम्भिक सूची तयार गरेको थियो । यसमा समाचार कक्ष बाहिरका कतिपय विज्ञ र स्रोतहरूबाट समेत सुझाव र सहयोग मागिएको जनाएको छ ।

यसरी तयार भएको १५० माथिको सूचीलाई विभिन्न विधा (राजनीति, समाज, कला÷साहित्य, संस्कृति, युवा तथा खेलकुद, ज्ञान विज्ञान, उद्यम व्यवस्था र डायस्पोरा) र स्पष्ट मापदण्ड तय गरी ८० मा झारिएको तथा अनि तयार भएको ८० जनाको सूचीलाई स्वतन्त्र जुरीसमक्ष प्रस्तुत गरेको अनलाइनखबरले जनाएको छ । १७ र २१ असार २०८१ मा बसेको जुरीको बैठकको निर्णय बमोजिम ४० वर्ष मुनिका ४० युवाको अन्तिम सूची तयार गरिएको अनलाइन खबरको दावी छ ।

अन्तिम नाम छनोट गर्ने जुरीमा सर्वोच्च अदालतका पूर्वन्यायाधीश अनिल सिन्हा, संयोजक, पूर्व बैंकर तथा नेपाल प्राइभेट इक्विटी एशोसिएसनका अध्यक्ष सिद्धान्तराज पाण्डे, त्रिभुवन विश्वविद्यालय समाजशास्त्र संकायकी उप–प्राध्यापक नीति अर्याल खनाल र अनलाइनखबरका प्रधानसम्पादक शिव गाउँले सदस्य थिए ।

समाजका विभिन्न क्षेत्रमा प्रभावकारी नतिजा दिएर क्रियाशील भइरहेका युवाको पहिचान तथा उनीहरुको विशिष्ट योगदान र सामाजिक प्रभावलाई मुलुककै उपलब्धिको रूपमा सार्वजनिक अभिलेखमा राख्नु ‘४० प्रभावशाली युवा’ छनोटको उद्देश्य रहेको अनलाइनखबर डटकमका प्रधानसम्पादक शिव गाउँलेले जानकारी दिए ।

४० प्रभावशाली युवा छनोटका लागि विभिन्न मापदण्ड बनाइएको अनलाइन खबरले जनाएको छ । उक्त मापदण्डमा पछिल्ला एक वर्षमा समाज रूपान्तरणका लागि विशिष्ट काम गरेका ४० वर्षभन्दा तलका युवा पहिचान गरिएको । समाजलाई प्रोत्साहन गरिरहेका, आफ्नो कर्म÷सोचद्वारा प्रेरित र तरङ्गित गरिरहेका, जसको कथाले समाजको उल्लेख्य हिस्सालाई ठूलो मात्रामा सकारात्मक प्रभाव पार्न सक्छ, त्यस्ता युवा । कुनै खास क्षेत्रमा उल्लेखनीय काम र निरन्तर संघर्षद्वारा समाज र समुदायमा अद्वितीय÷विशिष्ट योगदानकर्ता युवा । प्रचलित कुरीति र हानिकारक तथा गलत परम्परागत मान्यतालाई चुनौती दिएर समाजलाई लाभ पु¥याएका युवा । समाजमा इन्नोभेटिभ आइडिया दिएका, असल अभ्यासकर्ता जसको योग्य कामले पनि मूलप्रवाहको ध्यानाकर्षण गर्न सकेको छैन, त्यस्ता युवा । नेपाली समाजको विविधता झल्किने, उमेर र भूगोल समेतलाई ख्याल गरेर छनोटमा परेका युवा रहेको अनलाइन खबरले जनाएको छ ।

प्रभावशाली ४० भित्र परेका चुमान तनहुँका १० पालिकामध्ये माओवादीबाट प्रमुख जित्ने एक मात्र व्यक्ति हुन् । गण्डकी प्रदेशका ८५ स्थानीय तहले नै प्रशंसा गर्ने गरी चुमानले काम गरिरहेका छन् । जनताको जीवनलाई केन्द्रमा राख्दै स्वास्थ्य, शिक्षा, पर्यटन र कृषिलाई प्राथमिकतामा राखेर उनी काम गरिरहेका छन् । चुमानले आफू अध्यक्ष भएपछि नै पालिकाको आफ्नै अस्पताल मात्रै चलाएनन्, पालिकास्तरमै डायलाइसिस गर्ने देशभरिकै पहिलो गाउँपालिका बन्यो ।

पृथ्वी राजमार्ग हुँदै आउजाउ गर्ने मानिसहरूले रोकिएर पिसाब फेर्ने र मानिसहरूले दिल बहलाउने ऐना पहरामा चुमानले सिर्जनशील काम गरेर चकित पारिदिएका छन् । विद्यालय मर्ज गरेर टाढाका विद्यार्थीलाई अर्को विद्यालयसम्म पु¥याउन पालिका आफैंले बस चलाए भने ग्रामीण क्षेत्रका विद्यार्थीका लागि जीपको व्यवस्था गरेका छन् ।

सामुदायिक विद्यालय निजीभन्दा कम छैन भन्ने उदाहरण शुक्र नेतृत्वको पालिकाले पेश गरिरहेको छ । सयपत्री फूल पहिलो पटक कतार निर्यात गरेको आँबुखैरेनीले गुजारा चलाइरहेका किसानलाई करेसाबाट व्यावसायिक कृषितर्फ उन्मुख गराइरहेको छ । उनले पालिकामा हाटबजारको सुरुआत गरेका छन् ।

कृषि उत्पादन र पर्यटनलाई जोडेका शुक्रले छिम्केश्वरी, आँधीमुल जस्ता ठाउँलाई चम्काउन जुटिरहेका छन् । मर्स्याङ्दीमा मोटरबोट चलाएर पर्यटकलाई जलविहार गराएर आन्तरिक स्रोत समेत बढाइरहेका छन् । बाँस र फलामको सामग्री उत्पादनलाई औद्योगिक ग्राममा बदल्दै छन् जुन पूर्ण रूपमा सुरु हुँदा कम्तीमा १०० जनाले जागिर पाउने छन् ।