दमौली, भदौ ३
ब्राह्मण समाज नेपाल जिल्ला कार्यसमितिद्वारा आयोजित रक्षा बन्धनमा १९९ जनाले रक्षा सुत्र (जनै) बाँधेका छन् । धर्म संस्कृति र संस्कारको जोगर्ना गर्न गराउन एवं जातीय सद्भाव कायम गर्नका लागि समाजले विगतका वर्षहरू जस्तै यस वर्ष पनि दमौलीको अनसन चौतारीमा रक्षा बन्धनको कार्यक्रम आयोजना गरेको थियो ।
सो अवसरमा ब्राह्मण समाज नेपाल जिल्ला कार्यसमिति तनहुँका अध्यक्ष कृष्णचन्द्र पाण्डे, समाजका कोषाध्यक्ष गङ्गाप्रसाद पोख्रेल, पराशर आश्रमका गुरु र बटुकहरुले रक्षा सुत्र लगाईदिएका थिए । उक्त कार्यक्रममा बिभिन्न जातजातिका मानिसहरुको सहभागिता रहेको ब्राह्मण समाज तनहुँका अध्यक्ष पाण्डेले जानकारी दिए ।
कैदीबन्दीलाई रक्षा बन्धन
तनहुँ कारागारका कैदीबन्दीलाई रक्षा बन्धन लगाएका छन् । बह्माकुमारी ईश्वरीय विश्वविद्यालय नेपाल शाखा कार्यालय दमौलीले कारागारका कैदी बन्दीहरुलाई रक्षा बन्धन लगाइदिएका हुन् ।
दमौली शाखा सञ्चालिका बह्माकुमारी यमुनालगायतले सोमबार बिहान ९ बजेदेखि कैदी बन्दीलाई रक्षा बन्धन गरेका थिए । कारागारका महिला र पुरुष दुवैलाई रक्षा बन्धन गरिएको तनहुँ कारागारका निमित्त प्रमुख नारायणप्रसाद अधिकारीले जानकारी दिए ।
अधिकारीका अनुसार तनहुँ कारागारमा २७ महिला र बाँकी पुरुष गरी तीन सय २६ जना कैदीबन्दी रहेका छन् ।
