दमौली, भदौ ६
पृथ्वीराजमार्गमा पर्ने आबुखैरेनी गाउँपालिकाको ऐनापहरा झरना पछिल्लो समय पर्यटकीय गन्तव्य बन्दै गईरहेको छ । पछिल्ला दिनमा यहाँ आन्तरिक पर्यटकको घुइँचो लाग्ने गरेको छ । यहाँको प्राकृतिक पहरामा कला भरेर गाउँपालिकाले पर्यटकलाई आकर्षित गरेको छ । आबुँखैरेनी गाउँपालिकाको वडा नम्बर २ र ४ को सिमानामा पर्ने ऐना पहरा झरनामा गाउँपालिकाले पर्यटकीय पुर्वाधार निर्माण गरेर आकर्षक बनाएको छ ।
आकर्षक झरना, त्यसले फाल्ने चिसो हावा र बग्दै मस्र्याङ्दीमा झर्ने खोला, झरनासँगै रहेको बडेमानको ढुंगालाई खोपेर बनाइएको हात्ती, आमा–शिशुको मातृत्व झल्किने चित्र, ढुङ्गामाथी रोकिएको भगवान बुद्धको चित्र, हरियाली, चीनको ग्रेटवालकै झल्को दिने गरी बनाइएको झरनासम्म पुग्ने बाटो र पार्क तथा फूलले मनमोहक बनेको ऐना पहरामा अचेल पर्यटकको मेला नै लाग्ने गरेको छ ।
बिदाको दिनमा २ हजार भन्दा बढि र अन्य दिनमा हजार जनासम्म पर्यकटकहरु ऐनापहरामा टिकट काटेर अवलोकन गर्नेगर्छन् । त्यसबाहेक टिकट नकाटिकन राजमार्गको डिलमा बसेर फोटो लिने र झरनाको दृश्य हेर्नेहरुको संख्या त्यसको तेब्बर भन्दा बढि हुन्छ ।
ऐनापहरा पहाडलाई नै कलामा बदल्ने काम भइरहेको आबुँखैरेनी गाउँपालिका अध्यक्ष शुक्र चुमानले बताए । प्राकृतिक रुपमै गणेशको जस्तो आकृति थियो, त्यसलाई कला भरेर गणेशको बनाइएको उनले बताए । यस्तै गाउँपालिकाले आधुनिक कलाका रुपमा ऐना पहरामै आमाले छोरालाई ममता प्रकट गरिरहेको र परीको चित्र खोपिएको छ । त्यहाँ पुगेका पर्यटकहरू प्रकृति र कलाको सामिप्य महशुस गर्दै आनन्दित हुन पाउनेछन् ।
यसबाहेक गाउँपालिकाले ऐना पहरा झरनासम्म जानका लागि आवश्यक पूर्वाधार तयार पारिरहेको छ । जसमा झरनासम्म पुग्नका लागि सिँढी बनाउने काम भएको छ भने पर्यटकको सहजताका लागि शौचालय, टिकट काउन्टर लगायत पुर्वाधार निर्माण पनि गरिएको छ ।
पोखरातिरबाट पृथ्वी राजमार्ग हुँदै जाँदा मुग्लिन नपुग्दै आँबुखैरेनी बजारबाट एक किलोमिटरको दूरीमा छ, ऐना पहरा । तनहुँकै अग्लो पर्वत शृंखला छिम्केश्वरीको फेदीबाट बग्दै आउने सिउदी खोला अन्तिम विन्दु ऐना पहरा झरनासँगै पालिकाले बनाएको आकृति देशकै चर्चाको विषय बन्न पुगेको छ भने त्यहाँका तस्वीर सामाजिक सञ्जालमा समेत भाइरल बन्दै आएका छन् ।
पृथ्वी राजमार्ग भएर यात्रा गर्ने हजारौँ यात्रुलाई त्यहाँ बसेर मनोरम झरनामा मज्जा लिने वातावरण मिलाउन गाउँपालिकाले गरेको हो । झरनासम्म पुग्न नेपालीलाई ५० रुपैयाँको टिकट लिएर प्रवेश गराउने योजना बनाएको छ । त्यसले गाउँपालिकाको आन्तरिक आम्दानी पनि बढाएको छ ।
गाउँपालिकाले ऐनापहराको पुर्ण विकासका लागि करिब पाँच वर्ष नै लाग्ने अनुमान गरेको छ । योजनालाई पूर्ण सम्पन्न गर्नका लागि प्रदेश र संघ सरकारसँग समेत गाउँपालिकाले सहयोग मागेको अध्यक्ष बताउँछन् ।
लोकवाणी दैनिकबाट
