दमौली, भदौ ८
तनहुँको व्यास नगरपालिका–४ स्थित धार्मिक तथा पर्यटकीय स्थल तनहुँ सहिद कालिका जङ्गल पार्कमा सरसफाई गरिएको छ । दमौलीका युवा अभियान्ता सुदीप गफ्फारको नेतृत्वमा मन्दिर जाने बाटो तथा मन्दिर परिसरमा सरसफाइ कार्यक्रम आयोजना गरिएको हो ।
उक्त सरसफाईमा व्यास नपा–४ का जनप्रतिनिधि, स्थानीय बासिन्दा, विद्यार्थीहरु तथा चापाघाटस्थित कालीभञ्जन गण (इ) का सेनाहरु सहभागी थिए । दमौलीको महत्वपुर्ण धार्मिक तथा पर्यटकीय क्षेत्र सहिद कालिका मन्दिर तथा मन्दिर जाने बाटो र वरपर निकै झाडी बढेको हुँदा सरसफाई गरिएको युवा अभियन्ता गफ्फारले बताए ।
मन्दिर जाने बाटो र मन्दिर परिसर सरसफाई गरि मन्दिर क्षेत्रमा धार्मिक पर्यटकहरुको बृद्धि गराउने र यस क्षेत्रलाई धार्मिक पर्यटकीय गन्तव्यको रुपमा विकास गराउने उद्देश्यले सरसफाईको आयोजना गरिएको गफ्फारले बताए ।
व्यास ४ का वडा अध्यक्ष मनबहादुर गुरुङले यस क्षेत्रमा अव नियमित सरसफाई भईरहनु पर्ने बताए । उनले कालिका मन्दिरलाई धार्मिक पर्यटकीय गन्तव्यको रुपमा विकास गराउन यो अभियानले सहयोग पुग्ने बताए ।
