दमौली, भदौ १०
गत शुक्रबार पृथ्वीरामाजमार्गको आबुँखैरेनी गाउँपालिका–२ स्थित मस्र्याङदी नदीमा खसेको भारतीय नम्बर प्लेटको बस निकाल्नकोलागि सोमबार पृथ्वीराजमार्ग करिब नौ घन्टा अबरुद्ध भयो ।
भारतीय पर्यटक बोकेर पोखराबाट काठमाडौं तर्फ जाँदै गरेको युपी ५३ एफटी ७६२३ नम्बरको भारतीय बस शुक्रबार दिउँसो ११.२० बजे मस्र्याङदी नदीमा खसेको थियो । सोही बस निकाल्न सोमबार विहान ६ बजेबाट पृथ्वीरामार्गको आबुँखैरेनी–मुग्लिन खन्ड बन्द गरिएको थियो ।
विहान ६.३० देखी १० बजेसम्मकोलागि सडक बन्द गरेर उक्त गाडी निकाल्ने सुचना स्थानीय प्रशासनले जारी गरेपनि सो समयमा गाडी निकाल्न सकिएको थिएन । उक्त गाडी दिउँसो करिब ३ बजे निकालेपछि मात्र आबुँखैरेनी–मुग्लिन खन्ड सुचारु भएको थियो ।
आबुँखैरेनीबाट मुग्लिनसम्म जाने अर्काे बैकल्पिक सडक नभएपछि मुग्लिन र आबुँखैरेनीमा सयौं सवारी साधन दिनभर जाममा परेका थिए । सो क्रममा विरामी तथा जेष्ठ नागरिकहरुलाई समस्या भएको थियो ।
उक्त दुर्घटनामा २७ जना भारतीय नागरिकको मृत्यु भएको थियो भने १६ जना घाईते र १ जना बेपत्ता भएका छन् ।
