दमौली, भदौ ११
स्वास्थ्य बिमाको रकम शोध भर्ना नपाउँदा तनहुँको शुक्लागण्डकी नगरपालिका–५ बेलचौतारास्थित जीपी कोइराला श्वासप्रश्वास उपचार केन्द्रमा बिरामीको उपचार रोकिने जोखिम भएको छ । स्वास्थ्य बीमा बोर्डले चार करोड २० लाख रुपियाँ भुक्तानी नदिएकाले उपचारको लागि समस्या भएको केन्द्रले जनाएको छ ।
रकम भुक्तानी नपाउँदा आर्थिक अभावले गर्दा औषधि र अन्य आवश्यक सामग्री खरिद गर्न समस्या भईरहेको केन्द्रका फार्मेसी अधिकृत मुकुन्दप्रसाद यादवले बताए । पुस सम्मको भुक्तानी दिएपनि माघ देखि साउन सम्म गरी सात महिनाको चार करोड २० लाख रुपियाँ भुक्तानी नदिएकोले उपचार नै रोक्नु पर्ने स्थिती आउन लागेको उनले बताए ।
औषधी, ल्याबका केमिकल, एक्सरे लगायतका आवश्यक स्वास्थ्य सामग्री किन्ने रकम नहुँदा उपचार प्रभावित भएको यादवले बताए । बिमाबाट औषधि मात्रै नभएर ल्याब र अप्रेशन सेवा समेत दिनुपरेकाले खर्च धान्न कठिन हुँदा सेवा नै रोक्नु पर्ने अवस्था आउन लागेको यादवको भनाई छ । यादवले भने ‘औषधि तथा स्वास्थ्य सामग्री गरी मासिक ६० लाख बढी खर्च हुन्छ भुक्तानी रोकिँदा सेवा प्रवाहमा सङ्कट आएको छ ।
९० प्रतिशत भन्दा बढी बिरामी बिमा अन्तरगतका हुने भएकोले लामो समय शोधभर्ना नहुँदा उपचार गर्न नसकिने अवस्था आइसकेको केन्द्रले जनाएको छ । आर्थिक अभावले गर्दा औषधि र स्वास्थ्य सामग्री सप्लायर्सले भुक्तानी पाउन नसकेकोले उधारो नदिँदा सेवामा सङ्कट आएको यादवले बताए । यादवले भने ‘भुक्तानी नपाउँदा सप्लायर्सहरुले सामग्री दिन बन्द गर्ने चेतावनी दिइसकेका छन् इमरजन्सीमा भर्ना हुन आएका बिरामीको समेत भर्ना गर्न नसकिने अबस्था आएको छ ।’
यादवका अनुसार बिमा बोर्डलाई केन्द्रको समस्या र औषधि सप्लायर्सले दिएको चेतावनीको जानकारीसहित पत्राचार गर्दा पनि रकम भुक्तानीमा गम्भिरता नभएकोले समस्या परेको छ । औषधि, ल्याब केमिकल, एक्सरेलगायत स्वास्थ्योपचारमा आवश्यक पर्ने सामग्री आपूर्ती भुक्तानी रोकिँदा प्रभावित भएको छ । थाइराईड लगायतको अप्रेसन समेत गर्न नसकिने अवस्थामा पुगेको छ । प्रत्येक फार्मेसीलाई नेपाल सरकारले औषधि खरीदको लागि २० लाख रुपियाँ बिउ पुँजी दिने गरेपनि केन्द्रले रकम नपाउँदा समस्या परेको छ । केन्द्रमा सवारी दुर्घटनाका घाइतेका अलावा विभिन्न रोगका बिरामी नियमित आउने गरेका छन् ।
तनहुँको शुक्लागण्डकी नगरपालिका, भिमाद नगरपालिका, म्याग्दे गाउँपालिका, ऋषिङ गाउँपालिका सहित स्याङ्जा, पाल्पा र नवलपरासीका केही गाउँपालिकाका जनता पनि सेवा लिन आउने केन्द्रले जनाएको छ । ‘स्वास्थ्य सामग्री र औषधि किन्न नसक्दा पृथ्वीराजमार्गका साथै सहायक राजमार्गमा दुर्घटना भएर घाईतेलाई उपचारको लागि ल्याएभने पनि उपचार गर्ने सामग्री नभई फिर्ता गर्नु पर्ने अवस्था आउन लागेको छ उनिहरुको ज्यानै जान सक्ने जोखिम भएको छ ।’ फार्मेसी अधिकृत यादवले भने ।
