दमौली, भदौ ११
व्यास नगरपालिका–१४ स्थित तनहुँको प्रसिद्ध छाब्दीवाराही पुननिर्माण सम्पन्न भएको छ । गन्डकी प्रदेश सरकार र छाब्दी बाराही विकास कोषको आन्तरिक कोषको करिब ७० लाख रकमबाट उक्त मन्दिरको पुनर्निर्माण भएको हो ।
प्यागोडा शैलीमा पुनर्निर्माण भएको मन्दिर आकर्षक देखिएको छ । गण्डकी प्रदेश सरकारको आर्थिक सहयोग र छाब्दीवाराही विकास कोषको आन्तरिक कोषबाट मन्दिरको पुनर्निर्माण गरिएको कोषका अध्यक्ष प्रेमबहादुर थापाले जानकारी दिए ।
मन्दिर निर्माणका लागि गण्डकी प्रदेश सरकारले २४ लाख उपलब्ध गराएको थियो भने विकास कोषको आन्तरिक कोषबाट ४६ लाख लगानी गरिएको कोषका अध्यक्ष थापाले बताए । करिब एक वर्षमा पुनर्निर्माण पूरा भएको मन्दिरमा गत शुक्रबार छाब्दीवाराहीको मूर्ति प्रतिस्थापन समेत गरिएको छ ।
मगरजातीका पुजारीले पुजा गर्ने उक्त मन्दिरमा साउन महिनाभर तथा एकादशी र औँसी बाहेकका अन्य सबै नित्य पुजा हुने र उक्त दिनहरुमा हाँस, परेवा, बोका, राँगाको बलि दिइने गरिन्छ । छाब्दीवाराही मन्दिर परिसरमा पुरानो छाब्दी वाराही मन्दिर, माछाको मुखको धारा, पोखरीमा माछा, पोखरीको बीचमा मस्त्यगन्धाको मूर्ति छ ।
