दमौली, भदौ १४
म्याग्दे गाउँपालिकाले वडा स्तरमा मेलमिलाप केन्द्र स्थापना गरेको छ । वडामा हुने देवानी प्रकृतीका विवाद, झैझगडा, मनमुटाव तथा असमझदारीहरुलाई वडा स्तरमै मेलमिलाप गराउने उद्देश्यले सो मेलमिलाप केन्द्र स्थापना गरिएको गाउँपालिकाले जनाएको छ ।
वडा नम्बर ४ मा स्थापना गरिएको मेलमिलाप केन्द्रको शुक्रबार गाउँपालिकाका अधयक्ष श्रीप्रसाद श्रेष्ठले बताए । सो अवसरमा बोल्दै अध्यक्ष श्रेष्ठले सकेसम्म कसैसँग पनि विवाद आउन नदिने र विवाद भईहालेमा वडा स्तरको मेलमिलाप केन्द्र मार्फत मिलापत्र गर्न सुझाव दिए ।
स्थानीय स्तरमा उत्पन्न हुने विभिन्न किसिमका झैझगडा, आपसी असमझदारी तथा अन्य विवादहरूलाई वडास्तरमै समस्याको समाधान गर्नको निम्ति वडास्तरीय मेलमिलाप केन्द्र स्थापना गरिएको अध्यक्ष श्रेष्ठले बताए ।
उक्त कार्यक्रममा गाउँपालिकाका उपाध्यक्ष बालकृष्ण घिमिरेले मेलमिलाप केन्द्रको माध्यमबाट विवाद समाधान गर्नुपर्ने बताए । उक्त कार्यक्रमको अध्यक्षता वडा नम्बर ४ का वडा अध्यक्ष दिपक श्रेष्ठले गरेका थिए । कार्यक्रमको सन्चालन गाउँपालिकाका प्रशासन शाखाका प्रमुख इन्द्र खनालले गरेका थिए ।
म्याग्दे गाउँपालिकाले सबै वडामा मेलमिलाप केन्द्र स्थापनाको गर्ने उद्देश्यले वडा स्तरबाट छानिएका मेलमिलापकर्ताहरुलाई २०८१ बैशाख २६ देखी जेठ २ गतेसम्म ४८ घन्टे मेलमिलाप सम्बन्धी तालिम दिएको थियो । सोही तालिमबाट सुचिकृत भएका मेलमिलापकर्ताहरुले सम्बन्धित वडाको मेलमिलाप केन्द्र मार्फत विवाद समाधानकोलागि मेलमिलाप गराउने गाउँपालिकाले जनाएको छ ।
यस अघि वडा नम्बर १ मा भदौ १२ गते, वडा नम्बर २ मा भदौ ११ गते, वडा नम्बर ३ मा भदौ १३ गते मेलमिलाप केन्द्र स्थापना भईसकेको र बाँकी रहेका वडा मध्ये वडा नम्बर ५ मा भदौ १६ गते, वडा नम्बर ६ मा भदौ १७ र वडा नम्बर ७ मा भदौ १८ गते मेलमिलाप केन्द्र स्थापना गरिने गाउँपालिकाका सुचना प्रविधि अधिकृत आकाश गुरुङले जानकारी दिए ।
