देवघाट, भदौ १७
काठमाडौं निवासी समाजसेवी तथा शिक्षा सेवी इनु अर्यालले देवघाटमा निर्माणाधिन देवघाट सार्वजानिक पुस्तकालयलाई एक लाख रुपैयाँ सहयोग गरेकी छिन् । महिलाहरूको स्वास्थ्य र शिक्षामा विशेष जोड दिने समाजसेवी, शिक्षाप्रेमी अर्यालले निर्माणाधीन देवघाट सार्वजनिक पुस्तकालयका निम्ति सोमबार एक लाख रुपैयाँ उपलब्ध गराउनु भएको देवघाट सार्वजानिक पुस्तकालयका अध्यक्ष शिवराज पौडेलले जानकारी दिए ।
देवघाट क्षेत्रको शैक्षिक उन्नयनका निम्ति समय समयमा विभिन्न योगदान दिदै आउनु भएकी अर्यालले पुस्तकालय निर्माणमा गर्नु भएको योगदानप्रति अध्यक्ष पौडेलले पुस्तकालयको तर्फबाट धन्यवाद दिएका छन् ।
यस अघि गत साता देवघाट गाउँपालिका वडा नम्बर ५ बटौले टोल घर भई हाल काठमाडांै बस्ने रामगोपाल सिवाकोटीले देवघाट सार्वजनिक पुस्तकालयका निम्ति ५१ हजार रुपैयाँ सहयोग गरेका थिए । पुस्तकालय निर्माणमा सहयोग गर्ने सिवाकोटीलाई पनि पुस्तकालयको तर्फबाट आभार व्यक्त गरिएको अध्यक्ष पौडेलले बताए ।
पुस्तकालय निर्माणको लागि हालसम्म विभिन्न व्यक्ति तथा संघ संस्था, देवघाट स्थित धार्मिक आश्रम, गुरुकुल तथा सामुदायिक वन एवं टोल विकास संस्थाहरुले सहयोग गर्दै आएका छन् । पुस्तकालय निर्माणको लागि हालसम्म करिब २० लाख रुपैयाँ संकलन भएको अध्यक्ष पौडेलले जानकारी दिए । अध्यक्ष पौडेलले पुस्तकालय भवन निर्माणकोलागि हालसम्म सहयोग गर्ने सबैलाई धन्यवाद दिई अन्य व्यक्ति तथा संघ सस्थालाई पनि भवन निर्माणमा सघाउन अपिल गरिएको बताए ।
उक्त भवनको विस्तृत परियोजना प्रतिवेदन अनुसार कूल लागत ३ करोड ६८ लाख रुपैयाँ रहेको अध्यक्ष पौडेलले जानकारी दिए । पौडेलका अनुसार १० हजार भन्दा बढी आर्थिक सहयोग गर्ने दाताहरुको नाम शिलालेखमा उल्लेख गरिने छ । हाल देवघाट सार्वजनिक पुस्तकालयको दैनिक कार्य नेपाल रेडक्रस सोसाइटी उपशाखा देवघाटबाट भईरहेको छ ।
