देवघाटमा स्तरीय खेलमैदान बनाउन माग

देवघाट, भदौ २२

देवघाट युवा जागरण समाज नेपालद्वारा देवघाटमा गत भदौ १० देखी १९ गतेसम्म आयोजित प्रथम सेन्ट्रल कलेज नकआउट महिला फुटबल प्रतियोगितामा २ लाख ९० हजार १० रुपैयाँ खर्च भएको छ ।

खेलकुँद विकास समिति र तनहुँ जिल्ला फुटवल संघको संरक्षकत्वमा ‘स्वास्थ्यकोलागि खेलकुँद राष्ट्रको लागि खेलकुँद, लैङ्गिक समानताको लागि खेलकुँद’ भन्ने मुल नाराका साथ देवघाट गाउँपालिका–५ स्थित खेलकुँद मैदानमा आयोजित उक्त प्रतियोगितामा २ लाख ९० हजार १० रुपैयाँ खर्च भएको शनिबार देवघाटमा प्रतियोगिताबारे आयोजित सार्वजनिक सुनुवाई तथा सम्मान कार्यक्रममा जानकारी दिईयो ।

प्रतियोगिताको प्रथम पुरस्कार ५५ हजार ५५५ रुपैयाँ चितवनको भरतपुर स्थित सेन्ट्रल कलेजले उपलब्ध गराएको थियो । त्यसैगरि विभिन्न संघ संस्था तथा व्यक्तिगत तर्फबाट गरि २ लाख २१ हजार १९२ रुपैयाँ संकलन भएको प्रतियोगिताका संयोजक सन्दिप ढकालले जानकारी दिए ।

देवघाट युवा जागरण समाजका अध्यक्ष अन्जन सुनारको अध्यक्षतामा आयोजित सार्वजानिक सुनुवाई कार्यक्रममा देवघाट गाउँपालिका अध्यक्ष तिल बहादुर थापाले देवघाटको अधुरो खेलमैदानलाई पुरा गराउने बताए । यस अघिका जनप्रतिनिधिले वडा नम्बर ३ बाहेक सबै वडामा खेलकुँद मैदान निर्माण गरिसकेको हुँदा अब आफुहरुले उक्त खेल मैदानको स्तरोन्नती गर्ने अध्यक्ष थापाले बताए । गाउँपालिकाले खेलकुँदको क्षेत्रमा भएको बजेट सबैलाई विनियोजन गरिसकेको भन्दै अध्यक्ष थापाले राम्रो खेलमैदान बनाउन गाउँपालिकाको आधा बजेट हालेपनि नपुग्ने बताए ।

खेलकुँद विकास समिति देवघाटका अध्यक्ष अमर फेवालीले आफ्नो कार्यकाल भरि एउटा न एउटा खेल मैदान सम्पन्न गर्ने यदि यसमा स्थानिय सरकारले साथ नदिए युवाहरुलाई समेटेर काम गर्ने बताए । उनले युवाहरु कसरी अगाडी बढ्नु पर्छ भन्ने सन्देश गाउँपालिकालाई दिने बताए । देवघाटका युवाहरु खेलप्रेमी रहेको र सबैले खेलमैदानको आवश्यकता महशुस गरेको तर हात खुट्टा बाँधेर राखे पछि ग्राउडमा नाच भनेर त नाच्न त सकिँदैन भन्दै खेलाडीको प्रतिभा प्रस्फुटनको लागि पनि राम्रो खेलमैदान हुनु पर्ने फेवालीले बताए ।

खेलकुद समिति देवघाटका पुर्व अध्यक्ष सुकु गुरुङले यस अघि देवपुर टोल विकास संस्थाले आयोजना गरेको सेभेन ए साइडको खेलको पनि चाँडै नै सार्वजानिक सुनुवाई गर्ने बताए । देवघाटमा ११ ए साइडको लागि खेल मैदान नभएकोमा हिजोको दिनमा सार्वजनिक जग्गा छुट्याएको आज व्यक्तिले त्यो जग्गा उपभोग गरिरहेको छ तर स्थानिय सरकार यसमा मौन रहेको गुरुङले बताए । अव सबै लागि परेर खेलमैदान निर्माणको लागि सार्वजनिक जग्गा खोज्न गुरुङले आग्रह गरे ।

देवघाट खेलकुद समितिका पुर्व सदस्य बल बहादुर क्षेत्रीले देवघाटमा राम्रो र उपयुक्त खेलमैदान नभएको हुँदा राम्रो खेलाडी उत्पादन हुन नसकेको बताए । देवघाटमा निर्माणाधिन कवर्डहल पनि मापदण्ड अनुसारको नरहेको क्षेत्रीले बताए । कवर्डहल कम्तीमा पनि ३०/३२ मिटरको हुनु पर्ने तर देवघाटमा निर्माणाधिन कवर्डहल २५ मिटर मात्रै रहेको हुँदा प्राविधिकले कसरी पास गर्यो भन्ने प्रश्न क्षेत्रीले गरे । स्थानिय सरकारले खेलमैदानमा चासो दिएर आफुलाई बोलाएमा कुटो र कोदालो लिएर आउने तथा अतिक्रमण गरेको जग्गाको मान्छेलाई लखट्न लौरो बोकेर आउन पनि तयार रहेको क्षेत्रीले बताए । खेलकुद समितिको कार्यसमिति बनाउने बेलामा सबै तछाडमछाड गरि अघि बढ्ने अहिले काम नगर्ने र अहिले खेलकुद समिति निस्कृय भएको क्षेत्रीले आरोप लगाए ।

वडा नम्बर ५ खेलकुद समितिका अध्यक्ष टीका रानाले स्थानिय सरकारले खेलकुँदको क्षेत्रलाई चासो नदिएको बताए । खेलमैदान नहुँदा देवघाटमा खेलाडी उत्पादन नभएको र खेल खेलाउँदा बाहिरबाट खेलाडी ल्याउनुपर्ने बाध्यता रहेको उनले बताए ।

देवघाट महिला सञ्जालकी उपाध्यक्ष माया शर्माले देवघाटमा पहिलो पटक महिला फुटवल प्रतियोगिता आयोजना गरेर महिला खेलाडीको सम्मान र प्रतिभा प्रस्फुटन गरेकोमा महिला सन्जाल निकै खुसी भएको बताइन् ।

उक्त कार्यक्रममा प्रतियोगता सम्पन्न गर्न सहयोग गर्ने विभिन्न संघ सस्था तथा सहयोगीदाताहरुलाई सम्मान गरिएको थियो ।

तश्विरहरुः विष्णु मगर