चितवन, भदौ २२
रत्ननगर नगरपालिकाका प्रमुख प्रशासकीय अधिकृत सुकदेब लम्साल निजामती सेवा पुरस्कार २०८१ वाट पुरस्कृत भएका छन् ।
नेपाल सरकारले गतबर्ष घोषणा गरेको सो पुरस्कार निजामती सेवा दिवसको अबसरमा शनिबार प्रमुख प्रशासकीय अधिकृत लम्साललाई प्रदान गरिएको हो । काठमाडौंमा आयोजित एक औपचारिक कार्यक्रममा प्रधानमन्त्री केपिशर्मा ओलीले सम्मानपत्र सहित पुरस्कार प्रदान गरेका हुन् ।
नेपाल सरकारका उपसचिव समेत रहेका लम्साल विगत ८ महिना अघिदेखि रत्ननगर नगरपालिकामा प्रमुख प्रशासकीय अधिकृतको रुपमा सेवारत छन् । २७ बर्ष अघि २०५४ साल भदौ १५ गतेबाट निजामती सेवामा प्रवेश गरेका लम्साल मुखिया, खरिदार हुँदै २०६६ सालमा खुल्ला प्रतिस्पर्धाबाट प्रशासन तर्फ शाखा अधिकृतमा नाम निकाल्न सफल भएका थिए ।
२०७८ सालमा कार्यक्षमताको आधारमा उपसचिवमा बढुवा भएका लम्साल उनी सेवारत सरकारी कार्यालय, जिल्ला र विभागबाट ११ वटा सम्मान पाइसकेका नेपाल सरकारका कुशल कर्मचारी हुन् । कार्यक्षमतामा अब्बल सावित हुँदै आएका लम्सालसंग अहिले सम्म १८ वटा सरकारी कार्यालयमा काम गरेको अनुभव छ ।
यसैबीच यसैबर्ष लम्साल सेवारत रत्ननगर नगरपालिका पनि स्थानीय सरकार संस्थागत क्षमता मूल्यांकनमा देशभरबाट तेस्रो हुँदै संघीय मामिला तथा सामान्य प्रशासन मन्त्रालयबाट सम्मानित तथा पुरस्कृत भएको थियो ।
