दमौली, असोज १२
तनहुँका स्थानीय तहका अधिकृत, विपद तथा वातावरण शाखाका फोकल पर्सन र सरोकारवाला निकायका प्रमुखसँग जलवायु उत्थानशील क्षमता अभिवृद्धि सम्बन्धि अन्तरक्रिया कार्यक्रम आइतबार दमौलीमा सम्पन्न भएको छ ।
राष्ट्रिय प्रकृति संरक्षण कोष र डिभिजन वन कार्यालय तनहुँको आयोजनामा दमौलीमा भएको कार्यक्रममा जलवायु परिवर्तनलाई केन्द्रमा राखेर हरेक खालको योजना र कार्यक्रम तर्जुमा गर्नुपर्नेमा जोड दिईएको थियो । तालिममा राष्ट्रिय प्राकृतिक संरक्षण कोषका क्षमता विकास अधिकृत सुनिल सापकोटा, सहायक वन अधिकृत नविन विश्वकर्मा, संरक्षण कोषका अध्यक्ष जलवायु विज्ञ डा.अनिता श्रेष्ठले जलवायु परिवर्तनको बारेमा कार्यपत्र प्रस्तुत गर्दै पालिका र पालिकावासीको माग र आवश्यकतालाई ध्यानमा राखेर जलवायु अनुलकुलनको कार्यक्रम बनाउन आवश्यक रहेको बताएका थिए ।
परम्परागत तवरले गरिएका खेती प्रणाली र विकास निर्माणको कार्यलाई प्रोत्साहन गर्ने गरी गण्डकी जलाधार जलवायु उत्थानशील आयोजनामार्फत तनहुँका १० वटा पालिका लगायतमा जलवायु उत्थानशील कार्यक्रम लागु परिने समेत बताईएको थियो । जलवायु उत्थानशील क्षमता अभिवृद्धि तालिम प्रत्येक पालिकाका लक्षित समुदायमाझ गरिनुपर्नेमा सामुदायिक वन महासंघ तनहुँका अध्यक्ष विष्णुकुमार श्रेष्ठ र नेपाल आदिवासी जनजाति महासंघ जिल्ला निवर्तमान अध्यक्ष वसुन्धरा घर्तीले जोड दिएका थिए ।
जलवायु उत्थानशील क्षमता अभिवृद्धिको लागि समुदायस्तरमा आवश्कता पहिचान गरी सोही अनुसारको अनुकुलनको कार्यक्रम गरिनु पर्ने निमित्त डिभिजन वन प्रमुख काशिराज पण्डितले बताए । पछिल्लो समय चर्चामा रहेपनि ग्रामिण क्षेत्रका समुदायलाई जलवायु परिवर्तनको असर र प्रभावको बारेमा गहन तवरले बुझाउन आवश्यक रहेको समेत निमित्त वन अधिकृत पण्डितको भनाई छ । उक्त कार्यक्रममा तनहुँका १० वटा पालिकाका अधिकृत, गैह्र सरकारी संस्था महासंघ र सामुदायिक वन महासंघ तनहुँका पदाधिकारी लगायत तालिममा ३० जनाको सहभागिता रहेको थियो ।
