दमौली, माघ ११
गैर सरकारी संस्था महासंघ नेपाल तनहुँ शाखाको आयोजनामा शुक्रबार बन्दीपुरमा जलवायु उत्थानशिल कार्य शुद्धिकरणका लागि सचेतनामुलक अभिमुखीकरण कार्यक्रम सम्पन्न भएको छ ।
गण्डकी जलाधार जलवायु उत्थानशिल आयोजनाको सहकार्यमा सम्पन्न उक्त कार्यक्रममा गैर सरकारी संस्था महासंघ नेपाल तनहुँ शाखाका अध्यक्ष प्रकाशचन्द्र भट्टराईको अध्यक्षतामा कार्यक्रम सम्पन्न भएको हो ।
कार्यक्रमका प्रमुख अतिथि बन्दीपुर गाउँपालिकाका अध्यक्ष सुरेन्द्र बहादुर थापाले जलवायु परिवर्तनका चुनौतीसँग सामना गर्नका लागि स्थानीय निकायका जनप्रतिनिधिहरूको सक्रिय भूमिका अपरिहार्य रहेको बताउँदै वातावरणीय संरक्षण र विकासलाई सन्तुलित बनाउने खालका कार्ययोजना निर्माणमा जोड दिन आग्रह गरेका थिए ।
कार्यक्रममा बन्दीपुर गाउँपालिकाका उपाध्यक्ष, वडाध्यक्षहरु, अन्य जनप्रतिनिधिहरू र पत्रकारहरूको सक्रिय सहभागिता रहेको थियो। सहभागीहरूले जलवायु उत्थानशिलताको अवधारणालाई व्यवहारमा लागू गर्न स्थानीय तहले प्रभावकारी भूमिका खेल्नुपर्ने धारणा राखेका थिए ।
उक्त अवसरमा गैर सरकारी संस्था महासंघ नेपाल तनहुँ शाखाका अध्यक्ष प्रकाशचन्द्र भट्टराईले जलवायु परिवर्तनका प्रभावबाट जोगिन सामूहिक प्रयास आवश्यक रहेको र यस कार्यक्रमले जनप्रतिनिधिहरूलाई थप सचेत बनाउने विश्वास व्यक्त गरे ।
कार्यक्रममा वडा नम्बर ५ का वडा अध्यक्ष ध्रुवराज लामिछाने, नेपाल पत्रकार महासंघ तनहुँका अध्यक्ष डिपि अधिकारी, नागरिक समाजका प्रतिनिधि गोबर्धन भट्टराई, सदन श्रेष्ठ लगायतले सचेतनामूलक यस्ता कार्यक्रमले दीर्घकालीन प्रभाव पार्ने विषयमा मन्तव्य राखेका थिए ।
उक्त कार्यक्रममा गैसस महासंघ तनहुँ शाखाकी सचिव सरिता थापा भण्डारीले जलवायु उत्थानशिल कार्यका सिद्धान्त, कार्यान्वयनका उपायहरू र चुनौतीहरूबारेमा सहजिकरण गरेकी थिइन् । कार्यक्रमको सन्चालन गैसस महासंघ तनहुँका सहसचिव ऋषिकान्त दुवाडीले र स्वागत उपाध्यक्ष सरला श्रेष्ठले गरेकी थिइन् ।
