दमौली, माघ २१
नेकपा एमालेले संगठन विस्तार र सवलिकरणका लागि तिन महिने वडा केन्द्रीत अभियान सन्चालन गर्ने भएको छ । एमाले तनहुँको गत माघ १८ गते बसेको जिल्ला कमिटिको बैठकले उक्त तिन महिने अभियानको कार्ययोजना निर्माण गरि पारित गरेको छ ।
अभियान अनुसार एमालेले आज माघ २२ गते १० वटै पालिकाको बैठक गर्ने भएको छ । यस्तै माघ २५ सबै जनवर्गीय संगठनको जिल्ला कमिटिको बैठक, माघ २६ गते जिल्लाका सबै ८५ वटै वडा कमिटीको बैठक, माघ २७ गते पालिका पदाधिकारी, जनवर्गीय संगठनका अध्यक्ष, सचिव र विभागिय इन्चार्जहरुको बैठक दमौलीमा हुने भएको छ । यसैगरि माघ २८ गते सबै वडा अध्यक्ष र सचिवहरुको प्रशिक्षण कार्यक्रम हुने भएको छ । एमालेले अधिवशेन गर्न बाँकी रहेका सबै जनबर्गिय संगठन र वडाहरुको माघ ३० सम्म अधिवेशन गरि सक्ने निर्णय गरेको छ ।
त्यस्तैगरि अभियान अन्तर्गत फागुन १ गतेदेखि १५ गतेसम्म सबै पार्टी सदस्यहरु सँग नेताहरुको घरदैलो कार्यक्रम गर्ने, पार्टी सदस्यको अवस्था बुझ्ने, गुनासोहरु सुन्ने, सदस्यता नविकरण अभियान संचालन गर्ने, पार्टी सदस्यका परिवारका सदस्यसँग राजनैतिक छलफल र अन्तरक्रिया गर्ने, पार्टी सदस्यका परिवारमा सदस्यता विस्तार पार्टी सदस्यता, जनवर्गीय सदस्यता दिने कार्यक्रम रहेको छ । सोही अवधिमा पार्टीको केन्द्रीय कार्यालय भवन निर्माणकोलागि प्रत्येक सदस्यसँग न्युनतम एक सय रुपैयाँ उठाउने, सदस्यको अनलाईन इन्ट्रिको लागि सदस्यको नागरिकताको फोटोकपी र सम्पर्क नम्बर संकलन गर्ने, पार्टी सदस्यताको अवस्थाको प्रतिवेदन तयार गर्ने कार्यक्रम रहेको छ ।
उक्त अभियानमा सम्बन्धित भुगोल कार्यक्षेत्र रहेका जिल्ला कमिटीका सदस्य, जनवर्गीय संगठनका जिल्ला सदस्य, नगर कमिटीका सदस्य, वडा कमिटीका सदस्य, सम्बन्धीत पालिकामा रहेका केन्द्र, प्रदेशका नेता र जनवर्गीय संगठनका केन्द्र, प्रदेशका सदस्यलाई हिडाइने भएको छ ।
यसैगरि फागुन १७ गते व्यास नपा, देवघाट, बन्दिपुर र रिसिङ गाउँ कमिटिको समिक्षा बैठक तथा फाल्गुन १८ गते शुक्लागन्डकी, म्याग्दे, भानु आँबुखैरेनी, घिरिङ र भिमाद कमिटिको समिक्षा बैठक हुने भएको छ । फागुन २१ गते सुखानीका सहिदहरुको स्मरणमा अन्तक्रिया कार्यक्रम आयोजना गर्ने, फागुन २४ गते संघीय निर्वाचन क्षेत्रगत रुपमा पार्टी सदस्यको भेला डुम्रे र शुक्लागन्डकीमा आयोजन गर्ने तथा चैत २ गते पालिकागत रुपमा पार्टी सदस्यता भेला सम्बन्धित पालिकामा गर्ने कार्यक्रम रहेको छ ।
यस्तै चैत ५ गते स्ववियु निर्वाचनको तयारी बैठक गर्ने, चैत ९ गते जनप्रतिनिधि र पालिका कमिटीको संयुक्त बैठक आयोजना गर्ने, चैत १५ र १६ गते दमौलीमा जिल्ला पदाधिकारी र कार्यपालिका तहसम्मका जनप्रतिनिधिको प्रशिक्षण कार्यक्रम आयोजना गर्ने कार्यक्रम रहेको छ । चैत २३ गतेसम्म पालिका कमिटी, वडा पदाधिकारी, वडा इन्चार्ज, जनवर्गीय संगठनका नेताहरु समेतको बैठकबाट पालिका कार्यकताहरुको अन्तर विरोध र समस्याको पहलकदमी जिल्लावाट गरी सक्ने, वैशाख ५ सम्म सबै टोल कमिटी गठन गर्ने र अभियानको अन्तिम दिन २०८२ बैशाख ९ गते दमौलीमा पाँच हजार कार्यकर्ताको सहभागितामा ३ महिने अभियान समापन कार्यकम गर्ने एमाले तनहुँका सचिव प्रदिपराज अधिकारीले जानकारी दिए ।