तनहुँ । फागुन ८
वडा नम्बर ६ का वडा सचिव नविन भुषालमाथी कार्यस्थलमै आक्रमण भएको भन्दै विरोधमा उत्रिएका बन्दीपुर गाउँपालिकका कर्मचारी काममा फर्किएका छन् । गत सोमबार वडा नम्बर ६ का वडा अध्यक्ष बलबहादुर गुरुङले वडा सचिव भुषालमाथी हातपात गरेको भन्दै सो को विरोधमा बन्दीपुर गाउँपालिकाका कर्मचारीले सोही दिन देखी अत्यावश्यक बाहेकका सम्पुर्ण सेवाहरु बन्द गरेका थिए ।
कर्मचारीहरुको हड्तालको कारण बन्दीपुर अस्पतालको ओपिडी सेवा बन्द हुँदा विरामीहरुले उपचार नपाएको तथा जेष्ठ नागरिक, अपाङ्गता भएका व्यक्ति, महिला तथा अन्य समुदायको सामाजिक सुरक्षाको कार्यक्रम समेत प्रभावित भएको भन्दै जनस्तरबाट चर्काे विरोध भएपछि कर्मचारीरुले विहिबार हड्ताल टुङग्याई काममा फर्किएका छन् ।
बन्दीपुर गाउँपालिकाका अध्यक्ष सुरेन्द्र थापाले विहिबारबाट गाउँपालिका कार्यालय तथा सम्पुर्ण वडा र सम्पुर्ण स्वास्थ्य चौकीको सेवा समेत पुवर्वत अवस्थामा सन्चालन भएको बताए । अध्यक्ष थापाले पीडित भएका भनिएका वडा सचिवलाई शुक्रबारबाट काममा फर्कन आह्वान गरेको बताए ।
