तनहुँ । जेठ १४
तनहुँ जलविद्युत आयोजनाको नदी सुरक्षा व्यवस्थापन योजना अन्तर्गत सेती नदीमा निर्माणधीन बाँधस्थल भन्दा तल्लो तटीय क्षेत्रका बासिन्दालाई बाढीजन्य विपद् जोखिम न्यूनिकरण तथा व्यवस्थापन सम्बन्धी सचेतना कार्यक्रम गरिएको छ ।
उक्त कार्यक्रममा नदी सुरक्षाविज्ञबाट आयोजनाको नदी सुरक्षा व्यवस्थापन योजना, बाँध सुरक्षा, मुख्य बाँध निर्माणस्थलभन्दा माथिल्लो तटीय क्षेत्रमा निर्माण गरिएको अस्थायी बाँध, त्यसबाट तल्लो तटीय क्षेत्रमा हुने नदीको बहावमा हुनसक्ने फेरबदल, सम्भावित क्षति, क्षति न्यूनिकरणका लागि पूर्वसचेतना, पूर्वसूचना, उद्धारलगायतका बारेमा तयार गरिएको प्रतिकार्य योजनालगायतका विषयमा विस्तृत रुपमा जानकारी दिइएको थियो ।
बाँध र सोबाट तल्लो तटीय क्षेत्रमा पानीको सतहमा आउन सक्ने उतारचढाव र त्यसबाट बच्ने उपायहरुकालगायतका विषय समेटिएको सन्देशमूलक डकुमेन्ट्रीसमेत सहभागीहरुलाई देखाइएको थियो । आयोजनाको बाँध र सोबाट तल्लो तटीय क्षेत्रमा पानीको सतहमा आउन सक्ने उतारचढावका विषयमा अग्रिम सूचना दिन १७ स्थानमा साइरन जडान गरी सञ्चालित छन् ।
