तनहुँ । जेठ, २६
बन्दीपुर गाउँपालिका–५ थुम्कामा समाजसेवी एवं नेकपा माओवादी केन्द्रका स्वर्गीय नेता भूमिनन्द लामिछानेको अर्धकद शालिक अनावरण गरिएको छ । थुम्का चौतारा परिसरमा आज बिहान एक समारोहबीच शालिक अनावरण गरिएको हो ।
स्थानीय थुम्का युवा समाजको पहलमा निर्माण गरिएको उक्त शालिकको अनावरण लामिछानेका सुपुत्र हरि लामिछानेले गरेका हुन् । शालिक अनावरण गर्दै लामिछानेले आफ्नो पिताप्रति देखाइएको सम्मान, माया र स्नेहका लागि थुम्का युवा समाजप्रति हृदयदेखि नै आभार व्यक्त गरे ।
२०७४ साल जेठ २५ गते ६६ वर्षको उमेरमा स्वर्गीय भएका लामिछाने सामाजिक सेवामा सक्रिय व्यक्तित्वका रूपमा चिनिन्थे । द्वन्द्वकालको समयमा आफ्ना छोराको निधन भइसकेपछि पनि उनी समाजसेवामा तल्लिन रहेका थिए ।
स्व. लामिछानेले बन्दीपुर बजारको सौन्दर्यकरणका लागि उल्लेखनीय योगदान दिएका थिए । बजारमा सवारी साधन प्रवेशमा रोक लगाई ढुंगा छपनीको प्रयोग गरेर बन्दीपुरलाई व्यवस्थित बनाउने कार्यमा उनले अग्रणी भूमिका खेलेको स्थानीयहरूले बताएका छन् ।
त्यसैगरी, थुम्का वरपरका क्षेत्रमा खानेपानी आयोजना सञ्चालन, विद्यालय निर्माण, सहकारी संस्था खोल्न पहल गर्नुका साथै बाटो निर्माण जस्ता थुप्रै सामाजिक कार्यहरूमा लामिछानेको योगदान उल्लेखनीय रहेको स्थानीयको भनाइ छ ।
स्व. लामिछाने नेकपा माओवादी केन्द्रका तत्कालीन जिल्ला सचिवालय सदस्यका रूपमा पनि सक्रिय थिए । पार्टी राजनीतिसँगै सामाजिक सेवामा समेत उत्तिकै सक्रिय रहेर जनताको मन जित्न सफल लामिछानेको स्मृतिमा स्थापित शालिकले याम्पा थुम्कावासीलाई प्रेरणा दिने विश्वास गरिएको छ ।
