तनहुँ । असार ११
म्याग्दे गाउँपालिकाले स्वास्थ्य क्षेत्र तर्फ म र मेरो स्वास्थ्य, मेरो जिम्मेवारी भन्ने नारालाई स्वास्थ्यको मुल आधार बनाएको छ । आगामी आर्थिक वर्षमा म्याग्देले अध्यक्षसँग स्वास्थ्य सुधार कार्यक्रम सन्चालन गर्ने भएको छ ।
गाउँपालिकामा रहेका २ वटा एम्बुलेन्स मध्ये एउटा एम्बुलेन्सलाई शव बाहान बनाइने गाउँपालिकाका अध्यक्ष श्रीप्रसाद श्रेष्ठले बताए । साथै १० शैयाको थर्पु आधारभुत अस्पतालमा स्वास्थ्य विमाको कार्यक्रम सन्चालन गरिने भएको छ । विभिन्न वडाहरुमा विभिन्न रोग सँग सम्बन्धित घुम्ती स्वास्थ्य परिक्षणका कार्यक्रमलाई आगामी आर्थिक वर्षमा पनि निरन्तरता दिइने भएको छ ।
हरेक परिवार स्वास्थ्य विमा कारोबार भन्ने नारा सहित सबै घर परिवारलाई स्वास्थ्य विमामा आवद्ध गराइने भएको छ । अध्यक्षसँग सुत्केरी कार्यक्रम अन्तर्गत सुत्केरीलाई जनही ५ हजार उपलब्ध गराउने कार्यक्रमलाई निरन्तरता दिइने भएको छ । विपन्न नागरिकलाई मुटु, क्यान्सर, मिर्गौला, अल्जाइमर्स, पार्किन्सस, स्पाइनल इन्जुरी, हेड इन्जुरी, तथा सिकलसेल एनिमियाका विरामीलाई संघीय सरकारबाट प्राप्त सेवा सुविधा प्राप्तिका लागि सिफारिस प्रक्रियालाई सहज बनाउने, थर्पु आधारभुत अस्पतालमा एकिकृत बर्थिङ सेन्टर सन्चालन गरि गभवती र सुत्केरी महिलालाई घरबाट स्वास्थ्य संस्थामा स्वास्थ्य संस्थाबाट घरमा निशुल्क यातयात सेवाको निरन्तरता दिने नीति तथा कार्यक्रममा उल्लेख छ ।
यसैगरि क्षयरोग मुक्त अभियान कार्यक्रम लागु गरि घरघरमा क्षयरोगको स्क्रिनिङ कार्य गरिने भएको छ । साथै पत्ता लागेका क्षयरोगीहरुलाई स्वास्थ्यकर्मीको प्रतक्ष्य निगरानीमा उपचारको व्यवस्था मिलाइने भएको छ । बा आमा घर दैलो स्वास्थ्य सेवा कार्यक्रम लागु गरि नसर्ने रोगहरुको पहिचानको लागि घर घर स्वास्थ्यकर्मी परिचालनको नीति लिइने गाउँपालिकाले जनाएको छ । यी सबै स्वास्थ्य कार्यक्रम सन्चालनको लागि म्याग्दे गाउँपालिकाले २ करोड ५७ लाख रुपैयाँ बजेट बिनियोजन गरेको छ ।
