अन्जान परियार । तनहुँ, असार १२
भिमाद नगरपालिका वडा नम्बर १ काउलेमा एक दिने निःशुल्क आयुर्वेद तथा योग शिविर सम्पन्न भएको छ । वडा कार्यालय परिसरमा बुधबार सम्पन्न उक्त शिविरबाट २४५ जना सेवाग्राहीले सेवा लिएका छन् ।
नगरपालिकाको आयुर्वेद शाखाको आयोजना शिविर सञ्चालन भएको थियो । वडा अध्यक्ष दीपक आलेको अध्यक्षतामा आयोजित कार्यक्रमको संविधानसभा सदस्य टुकराज सिग्देलले शिविरको उद्घाटन गरेका थिए ।
कार्यक्रमलाई सम्बोधन गर्दै सिग्देलले अहिलेको जीवनशैली, मानसिक तनाव, असन्तुलित खानपान र शारीरिक निष्क्रियताका कारण विभिन्न रोगहरूको जोखिम बढिरहेको बताए । यस्तो अवस्थामा आयुर्वेद र योग जस्ता परम्परागत जीवनशैलीको आवश्यक रहेको धारणा व्यक्त गरे । ‘स्वास्थ्य नै सबैभन्दा ठूलो सम्पत्ति हो’, सिग्देलले भने ‘योगले शरीर मात्र होइन, मन र आत्मालाई समेत सन्तुलनमा राख्न सहयोग गर्छ ।’
शिविरमा योग प्रशिक्षकले रोग अनुसारको योग अभ्यास गराएका थिए भने स्वस्थ जीवनशैली प्रवद्र्धन सम्बन्धी परामर्श पनि दिइएको थियो। रोग अनुसारको निःशुल्क आयुर्वेदिक औषधि वितरण गरिएको थियो ।
सो शिविरमा प्रदेश आयुर्वेद चिकित्सालयका चिकित्सकहरुले मधुमेह, उच्चरक्तचाप, ग्यास्ट्रिक, बाथ, मुटु, छाला सम्बन्धी, मानसिक समस्या, पत्थरी, पिनास, दम लगायत दीर्घरोगका बिरामीको परीक्षण तथा उपचार गरिएको थियो । साथै महिलाहरूको महिनावारी सम्बन्धी समस्या र विशेष स्वास्थ्य जाँच तथा उपचार पनि गरिएको वडा अध्यक्ष दीपक आलेले जानकारी दिएका छन् ।
