अन्जान परियार । तनहुँ, असार ११
भिमाद नगरपालिकाले वडा नम्बर १ का विपन्न दलित समुदायका व्यक्तिहरुलाई बाख्रा वितरण गरेको छ । बुधबार काउले स्थित वडा कार्यालयमा आयोजित कार्यक्रममा वडा नम्बर १ का दलित समुदायका १४ घरधुरीलाई बाख्रा वितरण गरिएको हो । सो अवसरमा संविधानसभा सदस्य टुकराज सिग्देल र वडा अध्यक्ष दीपक आलेले संयुक्त रूपमा दलित समुदायलाई बाख्रा वितरण गरेका थिए ।
उक्त कार्यक्रममा बोल्दै संविधानसभा सदस्य टुकराज सिग्देलले दलित समुदायको समृद्धिका लागि यस्तो प्रकारको सहयोग प्रभावकारी हुने विश्वास व्यक्त गरे । सहभागी लाभग्राहीहरूले यो सहयोगले आफूहरूलाई आत्मनिर्भर बन्न प्रेरणा मिल्ने बताएका छन् ।
वडा अध्यक्ष दिपक आलेले गत वर्ष २४ वटा माउ बाख्रा वितरण गरिएकोमा यस वर्ष १४ वटा बाख्रा वितरण गरिएको जानकारी दिए । उनका अनुसार वर्गीय उत्थान र आर्थिक सशक्तिकरणका लागि यो अभियान निरन्तर रूपमा अघि बढाइएको हो । दलित समुदायलाई आत्मनिर्भर बनाउन नेतृत्व विकास, सीपमूलक तालिम र आयआर्जनमा जोड दिँदै उन्नत जातका माउ बाख्रा वितरण गरिएको अध्यक्ष आलेले बताए ।
