तनहुँ । असार १५
व्यास नगरपालिका–५ चापाघाटस्थित शान्तिवर्ष आवासीय माध्यमिक विद्यालयले एसइई परिक्षामा ४ जिपिए ल्याउने छात्रा सहित उत्कृष्ट अंक ल्याउने सबै विद्यार्थीलाई सम्मान गरेको छ ।
आइतबार विद्यालयमा आयोजित कार्यक्रममा व्यास नगरपालिकाका प्रमुख बैकुण्ठ न्यौपानेले ४ जिपिए ल्याउने छात्रा स्नेहा गिरीलाई विद्यालयको तर्फबाट नगद १० हजार रुपैयाँ सहित सम्मान गरेका थिए । स्नेहाले परिक्षामा ४ जिपिए ल्याएकी थिइन् । ४ जिपिए प्राप्त गर्ने उनी व्यास नगरपालिका भित्रका विद्यालयका एक्ली विद्यार्थी हुन् ।
उक्त कार्यक्रममा ग्रेड ए प्लस ल्याउने ५ जना परिक्षार्थी सहित उत्तिर्ण हुने सबै परिक्षार्थीहरुलाई सम्मान गरिएको थियो । विद्यालयका प्रिन्सिपल उदित पौडेलका अनुसार उत्तिर्ण हुने विद्यार्थीहरु सबै बि ग्रेड भन्दा प्राप्त गर्ने छन् ।
विद्यालय सन्चालक समितिका अध्यक्ष दिपेन्द्रराज शाहीको अध्यक्षतामा आयोजित कार्यक्रममा नगर प्रमुख न्यौपाने, वडा नम्बर ५ का वडा अध्यक्ष विष्णुकुमार श्रेष्ठ हिमाल, विद्यालयका संस्थापक प्रिन्सिपल तथा संरक्षक डम्बरदेव कैनी, निवर्तमान अध्यक्ष तथा सल्लाहाकार वृषराज श्रेष्ठ, सल्लाहाकार बाबुलाल श्रेष्ठ, सन्चालक सदस्य निर्मला मल्ल, प्रबन्ध निर्देशक ओमराज श्रेष्ठ, प्रिन्सिपल उदिप पौडेल लगायतले उत्तिर्ण विद्यार्थीहरुलाई बधाई ज्ञापन गरेका थिए ।
पौडेल प्रिन्सिपल भएर आएपछि शान्तिवर्ष आवासिय माविले यस पटक जिल्लामै उत्कृष्ट नतिजा प्राप्त गरेको हो । प्रिन्सिपल पौडेलको मेहनेत, विद्यालय प्रतिको समर्पण तथा उनको प्रेरणाले विद्यार्थीहरुले गरेको परिश्रमको कारण विद्यालयले उक्त नतिजा प्राप्त गरेको एक शिक्षकले बताए ।
