देवघाट । असार १७
डिभिजन वन कार्यालय तनहुँले यस वर्षको गणेशमान सिंह सामुदायिक राष्ट्रिय वन पुरस्कारको लागि देवघाट गाउँपालिका–५ स्थित मधुवन सामुदायिक वन उपभोक्ता समुहलाई सिफारिस गरेको छ ।
डिभिजन वन कार्यालयले वन निर्देशनालय, गण्डकी प्रदेश पोखरा मार्फत वन तथा भू संरक्षण विभाग, बबरमहल, काठमाण्डौमा उक्त पुरस्कारकोलागि तनहुँबाट मधुवन लाई सिफारिस गरेको हो । विभागले गणेशमान सिंह सामुदायिक राष्ट्रिय वन पुरस्कारको लागि उत्कृष्ट काम गरेको एउटा वन समुहलाई सिफारिस गर्न डिभिजन वन कार्यालयलाई निर्देशन दिएको थियो ।
तनहुँ जिल्लामा रहेका सामुदायिक वन उपभोक्ता समुहहरु मध्ये उत्कृष्ट कार्य सम्पादन गरेको देवघाट गाउँपालिका वडा नम्बर ५ मा रहेको मधुवन सामुदायिक वन उपभोक्ता समुहलाई गणेशमान सिंह सामुदायिक राष्ट्रिय वन पुरस्कार कार्यविधिमा रहेको आधार र सूचकहरुको आधारमा मूल्यांकन गरी प्राप्ताङ्क सहित सिफारिस गरिएको डिभिजन वन कार्यालय तनहुँले जनाएको छ ।
मधुवन सामुदायिक वन समुहले वातावरण संरक्षणको क्षेत्रमा निकै उत्कृष्ट काम गर्दै आएको छ ।
