काठमाडौं । साउन २६
सङ्घीय मामिला तथा सामान्य प्रशासन मन्त्री भगवती न्यौपाने भूमि समस्या समाधान हुने बताउनुभएको छ । भूमि समस्या तथा समाधान आयोग तनहुँको टोलीसँग आइतबार मन्त्रालयमा भेटघाट गर्दै मन्त्री न्यौपानेले सो कुरा बताउनुभएको हो ।
टोलीले जिल्लामा भूमि समम्बन्धि समस्या समाधानको लागि पहल गर्न सङ्घीय मामिला तथा सामान्य प्रशासन मन्त्री भगवती न्यौपाने समक्ष माग राखेको थियो । मन्त्री न्यौपानेले भूमिहिन दलित, भूमिहिन सुकुम्बासी र अव्यस्थित बसोबासीको समस्या छिटो सम्पन्न गर्न जिल्लाका भएका प्रगतिको बारेमा चासो राख्नुभएको थियो । सरकारको तर्फको आवश्यक सहयोग गर्ने प्रतिबद्धता मन्त्री न्यौपानेले बताइन् । साथै मन्त्री न्यौपानेले जिल्लामा धेरै सङ्ख्यामा समस्या रहेकोले अहिलेको कार्य समितिले नै समाधान गर्नेमा आफू विश्वस्त रहेको बताउनुभयो ।
भूमी व्यवस्था सहकारी तथा गरिवी निवारणमा मन्त्री बलराम अधिकारीलाई भेट गरी समस्या अवगत गराउने कार्यक्रम रहेको विज्ञ सदस्य कार्कीले जानकारी दिनुभयो । कार्कीले नापी कार्यालयबाट जनताको दैनिक कार्य चुस्त दुरुस्त ढङ्ग जस्तै भूमि समस्या समाधान आयोगबाट पनि कार्य सम्पादन हुनेमा विश्वस्त रहेको बताउनुभयो ।
आयोगका जिल्ला अध्यक्ष गोविन्द सिलवाल, विज्ञ सदस्य श्रीराम कार्की, सदस्य रामचन्द्र उपाध्याय र सदस्य सचिव नापी कार्यालय तनहुँका प्रमुख विजयकुमार सिंहको टोलीले सोमबार काठमाडौंमा भेटी माग राखेको थियो । छिटो छरितो जग्गा धनी लालपूर्जा वितरणको लागि कर्मचारीहरु थप गरी सहज गरिदिनको लागि माग राखेको अध्यक्ष सिलवालले बताउनुभयो । समितिसँग सम्बन्धि समस्या समाधानको लागि माग गरिएको सिलवालले बताए सिलवालले भन्नुभयो, ‘छिटो, छरितोसँग आयोगको काम गर्न प्रतिबद्धता व्यक्त गर्नुभएको छ हामीलाई खुसी लागेको छ ।’
आवश्यक जनशक्तिको व्यवस्थापन गर्ने, भूमि विधेयकसँग जोडिएका कानुनहरु पारित गरी भूमिहिन दलित, भूमिहिन सुकुम्बासी र अव्यवस्थित बसोबासीलाई समयमा नै लालपुर्जा वितरण गर्ने वातावरण निर्माण मन्त्रीसँग माग राखिएको विज्ञ सदस्य कार्कीले बताउनु भयो । आयोगको कामलाई चुस्त तथा दुरुस्त बनाउन यातायात तथा जनशक्ति व्यवस्थापन सन्र्दभमा जिल्ला समन्वय समिति तथा सरोकारवाला कार्यालयमा पहल गरिदिनको लागि माग राखिएको आयोगका सदस्य रामचन्द्र उपाध्यायले बताउनुभयो । मैदानमा पुगेर छिटो सम्पन्न गर्नको सवारी साधनको प्रबन्ध मिलाउन माग राखिएको सिलवालले बताउनुभयो ।
कार्कीका अनुसार जिल्लामा देवघाट गाउँपालिका, आँबुखैरेनी, नापी कार्य सम्पन्न भईसकेको, बन्दीपुर गाउँपालिका, व्यास नगरपालिका, भानु नगरपालिका शुक्लागण्डकी नगरपालिका लगायतका पालिकामा नापजाँच भईरहेको छ । नापी सम्पन्न भएको वडाहरुको लालपूर्जा वितरणको आन्तिम तयारीको लागि जिल्ला मालपोत कार्यालयमा प्रमाणिकरणको लागि पठाईएको छ । देवघाटमा ६४, व्यासमा ५, आँबुखैरेनीमा ४६, शुक्लागन्डकीमामा २५ जना भूमिहिन दलित र भूमिहिन सुकुम्बासीको प्रमाणिकरणको लागि पठाईएको छ ।
जिल्लाका दशै पालिकामा गरी भूमिहिन दलित एक हजार ९७, भूमिहिन सुकुम्बासी एक हजार ६४९, अव्यवस्थित बसोबासी २३ हजार ८२२ गरी जम्मा २६ हजार ५६८ जना सूचिकृत भई नापजाँचको काम भईरहेको छ । सदस्य सचिव सिंहले जिल्लामा आयोगले २० जना कर्मचारी खटाएकोमा चार जना कर्मचारी हाल नरहेकोले काम गर्न समस्या परेको मन्त्री न्यौपाने समक्ष बताउनुभयो ।
स्थानीय तहबाट अपेक्षाकृत सहयोग नपाउँदा काम गर्न कठिनाई भईरहेको कार्यालय प्रमुख सिंहले बताउनुभयो । सिंहले भन्नुभयो ‘काम गर्ने कर्मचारीलाई साधन र स्रोतको अभाव रहेकोले काम गर्न कठिनाई भएकोले मन्त्रीज्यूलाई सम्बन्धित निकायमा पहल गरिदिन अनुरोध गरेका छौं ।’
