तनहुँ । भदौ ५
जिल्ला प्रहरी कार्यालय तनहुँका प्रमुख प्रहरी उपरीक्षक (एसपी) टेक बहादुर कार्कीले बुधबार इलाका प्रहरी कार्यालय आँबुखैरेनी तथा मातहत प्रहरी इकाइहरूको निरीक्षण तथा अनुगमन गरेका छन् ।
निरीक्षण कार्यक्रम अन्तर्गत एसपी कार्कीले इलाका प्रहरी कार्यालय आँबुखैरेनी, प्रहरी चौकी डुम्रे तथा अस्थायी प्रहरी पोस्ट मुग्लिङ पुलजिप तनहुँको स्थलगत निरीक्षण गरेका थिए । सो क्रममा उनले कार्यालय भवन, सम्पूर्ण शाखाहरू, प्रहरी ब्यारेक, हिरासत कक्ष, सिमा नाका तथा विभिन्न स्थानमा जडान गरिएका सिसिटिभी क्यामेराहरूको अवस्था बारे जानकारी लिए ।
निरीक्षणका क्रममा एसपी कार्कीले कार्यरत प्रहरी कर्मचारीहरूको व्यक्तिगत अनुशासन, पोशाक तथा व्यवहारसमेत मूल्याङ्कन गरिनुको साथै उन सबैलाई व्यवसायिक, अनुशासित तथा कर्तव्यनिष्ठ भएर कार्य गर्न निर्देशन दिएका थिए ।
साथै उनले त्रुटिरहित सेवा प्रवाह गर्दै शान्ति सुरक्षा कायम राख्न प्रहरी संगठनका मूल्य मान्यतालाई आत्मसात गर्नुपर्नेमा जोड दिएका थिए । एसपी कार्कीले प्रहरी सेवाको गुणस्तर अझ प्रभावकारी बनाउन निरन्तर मेहनत गर्नुपर्ने आवश्यकता औँल्याउँदै सेवा प्रवाहमा नागरिकको भरोसा जित्ने गरी काम गर्न आग्रह गरेका थिए ।
