देवघाट । असोज ६
देवघाट गाउँपालिका–५ मा रहेको हरिहर सन्यास आश्रमद्वारा सन्चालिन परमानन्द संस्कृत गुरुकुल विद्यापीठमा राष्ट्र कल्याणार्थ सामूहिक दुर्गा सप्तसती पाठ–पारायण सुरु भएको छ ।
राष्ट्रको कल्याण र समृद्धिको कामना गर्दै सामूहिक दुर्गा सप्तसती पाठ–पारायण कार्यक्रम सुरु भएको छ । नवरात्रसम्म चल्ने यस आध्यात्मिक कार्यक्रमलाई राष्ट्रको वर्तमान परिस्थितिलाई ध्यानमा राख्दै आयोजना गरिएको गुरुकुलले जनाएको छ ।
हालैको जेन जी आन्दोलनमा शहीद भएका आत्माहरूको स्मृतिमा अर्पण गरिएको उक्त पारायणमा गुरुकुलका आचार्य, विद्यार्थी र भक्तजनहरूको उत्साहपूर्ण सहभागिता रहेको छ । कार्यक्रमका संरक्षक स्वामी ज्ञानानन्द सरस्वतीले राष्ट्रहितका लागि वैदिक संस्कार र साधनाको महत्त्व औंल्याउँदै पाठ–पारायणलाई मार्गदर्शन गर्नुभएको छ ।
यसअघि पनि राष्ट्रकल्याणकै उद्देश्यले गुरुकुलमा सामूहिक रुद्राभिषेक सम्पन्न भएको थियो । निरन्तर साधना र वैदिक अनुष्ठानमार्फत राष्ट्रलाई शान्ति, स्थायित्व र सकारात्मक ऊर्जा प्रदान गर्ने गुरुकुलको प्रयासलाई सहभागीहरूले उच्च प्रशंसा गरेका छन् ।
