तनहुँ । मंसिर १३
जिल्ला प्रशासन कार्यालय तनहुँले आइतबारबाट राष्ट्रिय परिचयपत्र सम्बन्धी सेवा नियमित समयमै दिने भएको छ । यस अघि राष्ट्रिय परिचयपत्र सम्बन्धी सेवामा सेवाग्राहीको अत्याधिक भिड भएपछि प्रशासनले विहान ८ देखी साँझ ६ बजेसम्म त्यस सम्बन्धी सेवा दिँदै आएको थियो ।
हाल सेवाग्राहीको संख्या कम भएको र तिन थान स्टेशनबाट सेवा प्रवाहा भएको हुँदा नियमित समय विहान १० देखी साँझ ४ बजेसम्ममात्र प्रशासनले सेवा दिने निर्णय भएको प्रशासकीय अधिकृत विकास श्रेष्ठले जानकारी दिए ।
गत भाद्र २३ र २४ गतेको जेन्जी आन्दोलनको क्रममा जिल्ला प्रशासन कार्यालय तनहुँको प्रशासकीय भवनमा तोडफोड तथा आगजनी भएको र राष्ट्रिय परिचयपत्र सम्बन्धी सम्पूर्ण उपकरणहरु समेत जली नष्ट भएको थियो । घटना पश्चात केही दिन राष्ट्रिय परिचयपत्र सम्बन्धी सेवा अवरुद्ध हुन गएको राष्ट्रिय परिचयपत्र तथा पञ्जिकरण विभागबाट केहि समय पश्चात दुई थान स्टेशन मात्र प्राप्त भएको कारण कार्यालयमा सेवाग्राहीको चाप अत्याधिक रहेकोले राष्ट्रिय परिचयपत्र सम्बन्धी सेवा विहान ८ः०० बजेदेखि बेलुका ६ः०० बजेसम्म दिईदै आएका थियो ।
हाल सेवाग्राहीहरुको चाप कम हुदै गएको, हाल तिन थान स्टेशन समेत सञ्चालनमा रहेकोले नियमित कार्यालय समयमा सेवाप्रवाह गर्दा सहज रुपमा सेवा प्रवाह हुने अवस्था रहेको हुँदा आईतबार देखी राष्ट्रिय परिचयपत्र सम्बन्धी सेवा समेत नियमित कार्यालय समय भित्र मात्र प्रवाह गरिने श्रेष्ठले सुचना प्रकाशित गरि जानकारी दिएका छन् ।
