तनहुँ । फागुन १४
तनहुँ जिल्लाभर शुक्रबार निर्वाचन सम्पन्न नभएसम्म मदिराको विक्री–वितरण र सेवनलाई पुर्ण रुपमा निषेध गरिएको छ । जिल्ला प्रशासन कार्यालय तनहुँले विहिबार सुचना प्रकाशन गरि फागुन १५ गतेदेखी फागुन २१ गते प्रतिनिधि सभाको निर्वाचन सम्पन्न नहुँदासम्म मदिराको विक्री–वितरण र सेवनलाई निषेध गरिएको जनाएको छ ।
यही २०८२ साल फागुन २१ गते हुने प्रतिनिधिसभा सदस्य निर्वाचनलाई स्वच्छ, निष्पक्ष, तथा भयरहित वातावरणमा शान्तिपूर्ण रुपमा सम्पन्न गराउनको लागि तनहुँ जिल्लाभर मदिराको विक्री, वितरण र सेवनलाई पुर्णरुपमा निषेध गरिएको प्रमुख जिल्ला अधिकारी शिवलाल तिवारीद्वारा जारी सुचनामा जनाईएको छ ।
उक्त आदेशको उल्लंघन गरी मदिरा विक्री वितरण वा सेवन गरेको पाईएमा प्रचलित कानून बमोजिम कडा कारवाही गरिने प्रजिअ तिवारीले बताए । साथै, सुरक्षा निकायहरुबाट यसको कडाईका साथ अनुगमन गरिने पनि सुचनामा जनाईएको छ ।
निर्वाचनको समयमा सार्वजनिक शान्ति, सुरक्षा र सामाजिक सद्भाव कायम राखका लागि चालिएको यस कदममा जिल्लामा अवस्थित सबै होटल व्यवसायी, राजनीतिक दल, नागरिक समाज सर्वसाधारणवाट पूर्ण सहयोगको अपेक्षा गरिएको प्रजिअ तिवारीले बताए ।
