तनहुँ । चैत ९
व्यास नपा–६, सिसाघाट स्थित महेन्द्र ज्योति माविमा सञ्चालित बौद्धिक अपाङ्गता स्रोत कक्षाको सोमबार लेखाजोखा संयोजक ईश्वर बास्तोलाको नेतृत्वमा स्थलगत अनुगमन गरिएको छ ।
अनुगमनका क्रममा विशेष आवश्यकता भएका विद्यार्थीहरूको सिकाइ प्रक्रिया, उनीहरूको दैनिक खानपान (दिवा खाजा), स्वास्थ्य अवस्था र विद्यालयको भौतिक पूर्वाधारको वस्तुस्थिति बारे विस्तृत जानकारी लिइएको थियो । अनुगमनको क्रममा विद्यालयले सीमित स्रोत र साधनका बावजुद पनि बौद्धिक अपाङ्गता भएका बालबालिकाहरूलाई प्रदान गरिरहेको सेवा र स्नेही वातावरणको प्रशंसनीय रहेको वास्तोलाले बताए ।
अनुगमनका क्रममा विद्यालयले कक्षाकोठालाई अपाङ्गता मैत्री बनाउने प्रयास गरेको र विद्यार्थीहरूलाई खेलकुद तथा प्रयोगात्मक विधिबाट सिकाउने कार्य गरिरहेको पाइएको छ । यद्यपि, विद्यार्थीहरूको सर्वाङ्गीण विकासका लागि थप आधुनिक शैक्षिक सामग्री र नियमित स्वास्थ्य परीक्षणको व्यवस्था गर्नुपर्ने आवश्यकता अनुगमनको क्रममा औंल्याएको छ ।
सो अनुगमन कार्यक्रममा विद्यालयका प्रअ हरिराज काफ्ले, शिक्षकहरू बुद्धि कुमार बिक र शिव प्रसाद ढुङ्गाना, अपाङ्ग महासंघ गण्डकी प्रदेशकी सदस्य संगीता शर्मा तथा आया साधना श्रेष्ठ लगायतका ब्याक्तिहरुको उपस्थिति रहेको थियो ।
कार्यक्रममा बोल्दै सहभागीहरूले स्रोत कक्षालाई अझै व्यवस्थित र प्रभावकारी बनाउन स्थानीय सरकार, सामाजिक संघसंस्था र दाताहरूको थप समन्वय र सहयोग आवश्यक रहेकोमा जोड दिए । विद्यालय प्रशासनले प्राप्त सुझावहरूलाई आत्मसात गर्दै आगामी दिनमा सेवाको गुणस्तर अझ सुधार्ने प्रतिबद्धता व्यक्त गरेको छ ।
