तनहुँ । चैत १०
रास्वपाका उपसभापती एवं तनहुँ क्षेत्र नम्बर १ का सांसद डा.स्वर्णिम वाग्लेले तनहुँमा घरजग्गा खरिद गरेका छन् । प्रतिनिधि सभा निर्वाचनमा बिजयी भएपश्चात वाग्लेले बन्दीपुर गाउँपालिका वडा नम्बर ४ को टुँडिखेल नजिकै घर खरिद गरेका हुन् ।
वाग्लेले बन्दीपुर गाउँपालिका–४ स्थित कित्ता नं. ३४९ (ख) मा रहेको ०–३–३–० क्षेत्रफलमा बनेको पक्की घर दुई करोड मूल्यमा खरिद गरेका हुन् । बैंकको लिलाम प्रक्रियामा जान लागेको उक्त घर वाग्लेले खरिद गरेको बताईएको छ । निर्वाचन अघि बैना भएको उक्त घर वाग्लेले सोमबार जिल्ला मालपोत कार्यालय तनहुँमा आएर आफ्नो नाममा राजिनामा पास गरेका हुन् ।
सहिल लखन थापा गाउँपालिका गोरखाका स्थायी बासिन्दा रहेका वाग्ले २०८० को उपनिर्वाचनमा लड्न तनहुँ आएपछि उनलाई टुरिष्टको आरोप लागेको थियो । उपनिर्वाचनमा बिजयी भएपछि पनि तनहुँ नआएको आरोप लागेका वाग्ले गत प्रतिनिधि सभाको निर्वाचनमा ३८ हजार ४० मत प्राप्त गरि बिजयी भएका थिए ।
अव तनहुँबाट निरन्तर राजनीति गर्ने उद्देश्यले वाग्लेले घर खरिद गरेको रास्वापाका एक नेताले बताए । घर खरिदसँगै वाग्लेललाई लाग्दै आएको टुरिष्ट उम्मेदबारको आरोप भने खारेज हुने भएको छ ।
