तनहुँ । बैशाख १३
तनहुँका केही संस्थागत विद्यालयले नियम विपरित विद्यार्थी भर्ना वापतको शुल्क असुल गरेको पाईएको छ । शिक्षा विकास तथा समन्वय इकाइ तनहुँले नै जिल्लाका केही संस्थागत विद्यालयहरुले नियम विपरित विद्यार्थीबाट शुल्क लिईरहेको जनाएको हो ।
जिल्ला प्रशासन कार्यालय तनहुँले जिल्लाका केही विद्यालयहरुले संस्थागत विद्यालय शुल्क निर्धारण मापदण्ड २०७२ एवं प्रचलित कानुन विपरित अझैपनि शैक्षिक सत्र सुरु हुनुपुर्व विद्यार्थी भर्ना गर्ने र शुल्क लिने कार्य निरन्तर गरिरहेको भन्दै त्यस्तो कार्य नियन्त्रण गर्न शिक्षा विकास तथा समन्वय इकाइ तनहुँलाई निर्देशन दिएको थियो ।
शिक्षा विकास तथा समन्वय इकाइ तनहुँका प्रमुख भरतराज बरालले जिल्लाका दश वटै स्थानीय तहलाई पत्र पठाई शैक्षिक सत्र सुरु हुनुपुर्व विद्यार्थी भर्ना गर्ने र शुल्क लिने संस्थागत विद्यालयहरुको कार्य निन्त्रण गर्न र तोकिए बमोजिम व्यवस्थित गर्नको लागि सहजिकरण गर्न अनुरोध गरेका छन् ।
