देवघाट । जेठ १०
देवघाट गाउँपालिकाको आयोजनामा शनिबार कालिका माविको प्राङ्गणमा सामुदायिक विद्यालय स्तरीय शैक्षिक प्रर्दशनी प्रतियोगिता तथा सिकाई मेला सम्पन्न भएको छ । उक्त प्रर्दशनीमा देवघाट गाउँपालिका अन्तर्गतका सामुदायिक विद्यालयहरु पार्वती मावि, कालिगंगा मावि, आर्दश शिक्षा मावि, भृकुटी मावि, बालकेश मावि, राष्ट्रिय मावि, बज्रयोगिनी मावि, कालिका मावि तथा सिद्धमहाकाली माविको सहभागिता रहेको थियो ।
उक्त कार्यक्रममा बोल्दै देवघाट गाउँपालिकाका अध्यक्ष तिलबहादुर थापाले विद्यार्थीहरु सिर्जनात्मक काममा सरिक हुनुपर्ने बताए । शैक्षिक प्रदर्शनीको लागि मुख्य भूमिका शिक्षकहरुको रहेको र विद्यार्थीहरु त सिकारु मात्र रहेको र विगत वर्ष यता देवघाट गाउँपालिका अन्तर्गतका सबै सामुदायिक विद्यालयहरले शिक्षामा लगन र मेहनतका साथ शिक्षामा प्रगति गरेको अध्यक्ष थापाले बताए ।
गाउँपालिकाका अध्यक्ष थापाको अध्यक्षतामा सन्चालित उक्त कार्यक्रममा उपाध्यक्ष भुवन सिं गुरुङ, प्रमुख प्रशासकीय अधिकृत प्रधुम्न खड्का, वडा नम्बर ४ का अध्यक्ष मित्रलाल गुरुङ, देवघाट गाउँपालिका शिक्षा शाखा प्रमुख होमनाथ लामिछाने, कार्यपालिका सदस्य बाबुराम परियार तथा तर्फबाट भृकुटी माविका प्रअ राम शर्मा लगायतले मन्तव्य राखेका थिए ।
शिक्षा शाखा प्रमुख लामिछानेले विद्यार्थी भाइ बहिनीहरुको सिर्जनात्मक र बौद्धिक क्षमताको विकासका साथै वर्तमान शिक्षाको पाठ्यक्रममा अतिरिक्त क्रियाकलाप र परियोजना क्षमता विकास गर्ने उद्देश्यका साथ देवघाट गाउँपालिका शिक्षा शाखाले कार्यक्रमको आयोजना गरिएको बताए ।
उक्त प्रतियोगितामा सिर्जनात्मक, उपयोगिता ,प्रस्तुतिकरण विषय वस्तुसँग सम्बन्धित नवप्रवर्तन तथा समूहकार्य लगायत विभिन्न विषयमा मुल्यांकन गरिएको थियो । प्रतियोगितामा आदर्श मावि खाल्टे प्रथम, कालिका मावि देवघाट द्वित्तिय कालीगंगा मावि बैदी तृतिय भएका थिए ।
उक्त कार्यक्रमको सन्चालन देवघाट गाउँपालिका शिक्षा शाखा सहायक प्राविधिक सुबास सापकोटाले गरेका थिए ।
