तनहुँ । साउन २
तनहुँ क्षेत्र नम्बर २ का प्रतिनिधिसभा सदस्य ई. श्रीराम न्यौपानेले भिमाद नगरपालिका–७, राङरुङका अपाङ्गता भएका आमा–छोरालाई शनिबार ह्विलचियर प्रदान गरेका छन् । सांसद न्यौपानेले आफूले प्राप्त गरेको पारिश्रमिक सामाजिक कार्यमा लगाउने अभियान अन्तर्गत सुकुम्बासी परिवारका दुर्गाबहादुर परियारकी श्रीमती पार्वती परियार र २६ वर्षीय छोरा विश्व परियारलाई ह्विलचियर हस्तान्तरण गरेका हुन् ।
आफू राजनीतिमा व्यक्तिगत सुविधा वा लाभका लागि नभई राष्ट्रसेवा र जनताको हितका लागि आएको बताउँदै सांसद न्यौपानेले राज्यकोषबाट प्राप्त हुने सम्पूर्ण आर्थिक सुविधा समाजकै हितमा खर्चिने नीतिअनुरूप सहयोग गरिएको बताए ।
यसअघि सांसद न्यौपानेले सोही अभियानअन्तर्गत पहिलो महिनाको पारिश्रमिकबाट भिमाद नगरपालिका–४,सियालेका कर्णबहादुर कुमाललाई घरमै पुगेर ह्विलचियर उपलब्ध गराएका थिए । आर्थिक अभावका कारण ओछ्यानमै थुनिएर बस्नुपरेका कुमालले त्यतिबेला ह्विलचियर पाएपछि नयाँ जीवन पाएजस्तो महसुस भएको बताए ।
